नेहा चौधरीका ससुरा पनि पक्राउ, श्रीमान् डा. पंकज जेलमै

जनकपुरधाम । घरेलु हिंसामा परेकी महोत्तरीको रामगोपालपुर नगरपालिका ५ की नेहा चौधरीको ससुरा राम प्रवेश चौधरी पनि पक्राउ परेका छन् ।थप दाइजो माग्दै यातना दिएर घरबाट निकाला गरेपछि नेहाले श्रीमान् डाक्टर पंकज चौधरी, ससुरा राम प्रवेश र अन्य सदस्यमाथि मुद्दा दायर गरेकी थिइन् ।नेहाको श्रीमान् पंकज यसअघि नै पक्राउ परेका थिए । उनलाई अदालतले पुर्पक्षका लागि जेल चलान गरिसकेको छ । नेहाका ससुरा ६० वर्षीय रामप्रवेशलाई महोत्तरी प्रहरीले मनरासिस्वा नगरपालिका २ बाट आइतबार पक्राउ गरेको हो ।२०७८ फाल्गुन २५ मा नेहा र पंकजबीच सामाजिक परम्परा अनुसार विवाह भएको थियो । विवाहमा पंकजका परिवारले १ करोडभन्दा बढी दाइजो लिएका थिए । तर काठमाडौंमा घर पनि बनाइदिन भन्दै दबाब दिएको र नमानेपछि यातना दिएको नेहाको आरोप छ ।सम्बन्ध बिग्रेपछि पंकजले सुरुमा डिभोर्स मुद्दा दर्ता गराए । त्यसपछि नेहाले श्रीमान् पंकज, ससुरा राम प्रवेश र परिवारका अन्य ४ सदस्यमाथि जालसाजी, घरेलु हिंसा, दाइजो, माना चामल र अंश मुद्दा दायर गरेकी छन् ।साभार : नेपाल प्रेस