मुख्यमन्त्री स्वच्छता अभियान तथा सिंचाई डिभिजन जनकपुरका प्रमुख इन्जिनियर भगवान झा सरकारी सेवाबाट मुक्त भएका छन् ।
झाले उमेर हदका कारण अवकाश पाएका हुन् । आफू सरकारी कर्मचारीको रुपमा ३३ वर्ष नेपाली जनताको सेवा गरेर विदा भएको उनले बताए ।
उनी पछिल्लो समय जनकपुरधामस्थित मुख्यमन्त्री स्वच्छता अभियान तथा सिंचाई डिभिजन कार्यालयको प्रमुखको रुपमा कार्यरत थिए । इन्जिनियर झाले ५८ वर्षे उमेर हदका कारण असार १७ गतेबाट अनिवार्य अवकाश पाएका हुन् ।
सरकारी सेवाबाट विदा भएको जानकारी दिँदै झाले भ्रष्टाचार नगर्ने प्रतिवद्धताका साथ आफूले सरकारी सेवामा जागिर सुरु गरेको र भ्रष्टाचार नगरेरै बिदा भएको दावी गरेका छन् ।
यसैबिच झालाई प्रदेश २ का मुख्यमन्त्री लालबाबु राउत र मुख्यन्यायाधिवक्ता दीपेन्द्र झाले शनिबार सम्मान गरेका छन् । मुख्यमन्त्री निवासमा आयोजित एक कार्यक्रमका बिच इन्जिनियर झालाई मुख्यमन्त्री राउतले सम्मान गर्दै विदाई गरेका हुन् ।
सरकारी सेवाको अवधिमा प्रदेश २ मा विशेष योगदान पुर्याएको भन्दै उनलाई सम्मान गरिएको हो । झालाई विदाई गर्दै मुख्यमन्त्री राउतले अवकास पछि पनि समाज र जनताका लागि समर्पित हुन आग्रह गरे ।
साभार : द रियल समाचार
Comment here