लहानमा उपभोक्ता हितविपरीत पसल चलाउने व्यापारीलाई कारबाही

लहान । बाणिज्य आपूर्ति तथा उपभोक्ता संरक्षण विभाग वीरगञ्जले लहान बजारमा गरेको अनुगमनका क्रममा नियमविपरीत पसल सञ्चालन गर्ने व्यापारीलाई कारबाही गरेको छ ।अनुगमनको क्रममा म्याद गुज्रेका सामान बेच्ने, अखाद्य वस्तु मिसावट गर्ने, दर्ता तथा नवीकरण नगरी व्यवसाय सञ्चालन गर्ने, मूल्यसूची नराख्ने व्यापारीलाई जरिबानासहित कारबाही गरेको विभागका सूचना अधिकारी दीलिप खत्बेले बताए ।इलाका प्रशासन कार्यलय लहान, घरेलु तथा साना उद्योग कार्यालय र स्थानीय प्रहरीसहितको सहयोगमा संयुक्तरूपमा बजार अनुगमन गरिएको थियो । सोवक्रममा लहान ८ मा रहेको माखनभोग स्वीट एन्ड नम्किन सेन्टरलाई मूल्यसूची नराखेको र गुणस्तरहीन खाना बिक्री वितरण गरेको अभियोगमा ५० हजार, लहान-१ को माँ सती अन्सुयाही किराना स्टोर्सलाई २० हजार, सरस्वती बीज भन्डार र लहान-२ मा रहेको जय महिमा सप्लायर्सलाई १५/१५ हजार, एस टी.एम फर्मा प्रालिलाई बिल बिजक जारी नगरेको आरोपमा १० हजार, नोबेल मोबाईल हाउसलाई ५ हजार रूपैयाँ जरिबाना गरिएको छ ।अनुगमन टोलीले म्याद गुज्रिएका पेय पदार्थ, अन्य खाद्य वस्तुसमेत ४० किलोभन्दा बढी बरामद गरी डिस्पोज पनि गरेको छ ।साभार : नेपाल प्रेस