विचार

लोककथाको बाघ आउन लागेको हो त नेकपाभित्र?

धेरै काण्ड, धेरै समस्या र धेरै गलत कामहरुको पुञ्ज बनेको तर सत्तारुढ दल नेपाल कम्युनिस्ट पार्टी(नेकपा) को सरकार मदन्मत्त भएर निर्वाध अगाडि बढिरहेको छ । यसमा त्यो दलका अन्य नेताहरु पनि किंकर्तव्यविमूढ भएका देखिन्छन् । सरकार संविधानको धज्जी उडाउँछ, दलका अन्य नेताहरुको अस्तित्वमाथि कुनै वास्ता गर्दैन अनि विपक्षीहरुको कुनै वास्ता गर्दैन । तै पनि ती सबै अन्यमनस्क भावले सरकारप्रति त्वं शरणम् देखिन्छन् । कर्णालीको प्रदेश सरकारको अविश्वास,विश्वास अनि अविश्वासको घटनाले भने नयाँ समीकरण र नयाँ आँटको सम्भावना देखिएको छ ।
नेपालमा कोभिड -१९को संक्रमण प्रकोप समुदायस्तरमा पुगेको कुरा काठमाडौँ उपत्यकामा अनियन्त्रितरुपमा कोरोना विषाणुको विस्तारले देखाएको छ भन्ने सरुवारोगका विशेषज्ञहरुको छ । करिब डेढ लाख जतिको संख्या संक्रमणको देखिएको छ भने विसेक हुनेको संख्या पनि एक लाख जत्ति देखिएको छ । करिब ८००जतिको दुःखद निधन भइसकेको अवस्था छ । निधन हुनेको संख्यामा विशेषज्ञहरुको केही बढेको हुन सक्ने अनुमान पनि छ तर सरकारको काम अबचाहिँ संक्रमित संख्या र निधनको दैनिक प्रतिवेदन दिनेमा सीमित भएको छ । सरकार कुम्भकर्ण निद्रामा भन्दा सुतेर होइन, बिउँझिएर पनि सुतेको बहानामा छ । जसले जति कराए पनि , विरोध गरे पनि सरकार आफ्नो जनविरोधी निर्णयहरु गर्दै अगाडि बढिरहेको छ । स्वास्थ्य सेवाको कमीले संक्रमितहरु बाटा बाटैमा मर्न थालेका छन् छटपटाएर भन्ने समाचारहरु आइरहेका छन् ।

जनताले यस्तो संक्रमणको महामारी भएको बेलामा तर सरकारको दल नेकपाबाट कुनै गम्भीर चासो देखाएको सुन्न र देख्न पाएका छैनन् किनभने सरकारको दल नेकपा आफ्नै कृत्रिम तथा प्राकृतिक विवादमा अल्झिरहेको छ । कहिले सचिवालयमा अल्पमत, वहुमत, कहिले स्थायी समितिमा प्रधानमन्त्रीको राजीनामा या एक व्यक्ति एक पद जस्ता जनताका लागि खासै वास्ता नभएका तर जनतालाई झुक्याउने कुराहरु भई नै रहेका थिए । किन पनि कृत्रिम समस्या या जनतालाई झुक्याउने कुरा भनिएको हो भने त्यसको परिणामचाहिँ जनताका लागि होइन, बरु हात्ती आयो हात्ती आयो फुस्सा भएर समाप्त भएको देखिन्छ ।

Comment here