नेपालबाट भारततर्फ तस्करी हुँदै गरेको २१६ लिटर नेपाली मदिरासहित एक जना पक्राउ

2 महीना पहिले प्रकाशित

Smrititimes

जनकपुरधाम
जेठ २६ गते । भारत–नेपाल सीमामा तैनाथ एसएसबी (सशस्त्र सीमा बल) ४८औँ बटालियन ले नेपालबाट भारततर्फ अवैध रूपमा तस्करी गरी लैजाँदै गरेको २१६ लिटर नेपाली मदिरा बरामद गरेको छ। घटनामा संलग्न एक जना तस्करलाई पनि पक्राउ गरिएको छ।
एसएसबी ४८औँ बटालियन मुख्यालय जयनगरका कमाण्डेन्ट राजेन्द्र कुमारको निर्देशन तथा कमला सीमा चौकीका कम्पनी कमाण्डर सहायक कमाण्डेन्ट हिमांशु भूषण मोहन्तीको नेतृत्वमा खटिएको टोलीले सीमा स्तम्भ नम्बर २७२÷४ नजिकै विशेष गस्तीका क्रममा उक्त मदिरा बरामद गरेको हो।
एसएसबीका अनुसार नाका गस्तीमा रहेका सुरक्षाकर्मीहरूले नेपालबाट भारतीय क्षेत्रमा प्रवेश गरिरहेको एक व्यक्तिलाई शंकास्पद अवस्थामा देखेका थिए। ती व्यक्ति स्प्लेन्डर प्लस मोटरसाइकलमा ठूलो परिमाणमा मदिरा बोकेर भारततर्फ आउँदै थिए।
सुरक्षाकर्मीको उपस्थिति थाहा पाएपछि तस्करले मदिरा बोकेको मोटरसाइकल छाडेर नेपालतर्फ भाग्ने प्रयास गरेका थिए। तर एसएसबीका जवानहरूले उनलाई पछ्याएर नियन्त्रणमा लिन सफल भएका थिए।
जाँचका क्रममा मोटरसाइकलबाट ३०० मिलिलिटरका नेपाली मदिराका बोतलहरू गरी कुल २१६ लिटर मदिरा बरामद भएको एसएसबीले जनाएको छ।
पक्राउ पर्ने व्यक्ति भारतको जयनगर थाना क्षेत्रअन्तर्गत कुआढ गाउँ निवासी राम बाबु यादवका १९ वर्षीय छोरा राजा यादव रहेको खुलाइएको छ।
एसएसबीले आवश्यक कागजी प्रक्रिया पूरा गरी पक्राउ परेका युवक तथा बरामद सामानलाई थप कानुनी कारबाहीका लागि देवधा थाना प्रहरीको जिम्मा लगाएको छ। देवधा थाना प्रमुख ब्रजेश कुमार सिंहका अनुसार पक्राउ परेका युवकविरुद्ध मुद्दा दर्ता गरी उनलाई न्यायिक हिरासतका लागि मधुबनी पठाइएको छ।
भारतको बिहार राज्यमा मदिरा निषेध नीति लागू रहेकाले नेपालबाट हुने मदिरा तस्करी राज्य सरकार र सुरक्षा निकायका लागि चुनौती बन्दै गएको बताइएको छ ।