शहिदनगरमा बालिका सुरक्षा र हिंसा न्यूनीकरणबारे सचेतनामूलक छलफल

2 महीना पहिले प्रकाशित

Smrititimes

जनकपुरधाम
भदौँ १ गते । धनुषाको शहिदनगर नगरपालिकाको वडा नं. ७ मा बालिका सुरक्षा, हिंसा तथा दुव्र्यवहार न्यूनीकरणसम्बन्धी सचेतनामूलक छलफल कार्यक्रम सम्पन्न भएको छ।
प्लान इन्टरनेशनल नेपालको साझेदारी तथा जानकी महिला जागरण समाजको आयोजनामा र शहिदनगर नगरपालिका–७ को समन्वयमा कार्यक्रम सञ्चालन गरिएको हो। विगत दुई वर्षदेखि सञ्चालित सशक्त बालिका परियोजना अन्तर्गत धनुषाका पाँचवटा स्थानीय तहमा बालविवाह न्यूनीकरणका लागि विभिन्न गतिविधि सञ्चालन हुँदै आएका छन्।

कार्यक्रममा विशेषगरी बालिकामाथि हुन सक्ने हिंसा, दुव्र्यवहार, शोषण तथा अन्य जोखिमका विषयमा सहभागीहरूसँग अन्तरक्रिया गरिएको थियो। हिंसा र दुव्र्यवहारका विभिन्न स्वरूपबारे जानकारी गराउँदै सम्बन्धित विषयमा तयार पारिएको भिडियोसमेत प्रदर्शन गरिएको थियो।
अन्तरक्रियाका क्रममा एक–अर्कालाई अपमानजनक तथा नराम्रा शब्द प्रयोग गरी होच्याउनेदेखि अपरिचित व्यक्तिले विभिन्न प्रलोभन देखाएर बालबालिकालाई फकाउने, बेचबिखनको जोखिम तथा इन्टरनेट र सामाजिक सञ्जालको प्रयोग गर्दा हुन सक्ने सम्भावित जोखिमबारे चर्चा गरिएको थियो।
घर, समुदाय वा विद्यालय जुनसुकै स्थानमा बालबालिकामाथि गलत व्यवहार भइरहेको भए समयमै पहिचान गरी सम्बन्धित निकायमा जानकारी गराउन सके हिंसा तथा जोखिम न्यूनीकरण गर्न सकिने सहभागीहरूलाई जानकारी दिइएको थियो। साथै बालविवाह र दाइजो प्रथाजस्ता सामाजिक विकृति अन्त्यका लागि परिवार तथा समुदायको सक्रिय भूमिका आवश्यक रहेकोमा जोड दिइयो।

कार्यक्रममा आपत्कालीन अवस्थामा प्रयोग गर्न सकिने बाल हेल्पलाइन १०९८, नेपाल प्रहरी १००, प्लान इन्टरनेशनल नेपाल १६६००१३५५८० तथा जानकी महिला जागरण समाज १८१०५००००५८ मा निःशुल्क सम्पर्क गरी हिंसा, दुव्र्यवहारलगायतका घटनाबारे उजुरी तथा सहयोग लिन सकिने जानकारीसमेत दिइएको थियो। शहिदनगर–७ अन्तर्गत तारा टोल र धबौली टोलका अति विपन्न परिवारलाई लक्षित गरी आयोजित कार्यक्रममा किशोरी तथा युवा महिलासहित करिब ५० जनाको सहभागिता रहेको थियो। कार्यक्रमलाई जानकी महिला जागरण समाजकी कार्यक्रम संयोजक निकिता सिंह यादव र सामाजिक अगुवा कल्पना कुमारी यादवले सहजीकरण गरेका थिए। छलफलले समुदायमा बालिकाको सुरक्षा, अधिकार र जोखिम पहिचानबारे थप सचेतना फैलाउन सहयोग पुग्ने आयोजकले जनाएको छ।