इन्डो–नेपाल तेक्वान्दो प्रतियोगितामे प्रणव प्रशान्त झा स्वर्ण पदक जीतलनि

2 महीना पहिले प्रकाशित

Smrititimes

जनकपुरधाम
२१ गते भादब । बीरगञ्जमे काल्हि सम्पन्न इन्डो–नेपाल तेक्वान्दो प्रतियोगितामे धनुषाक मुखियापट्टी मुसहरनिया गाउँपालिका–४, कोलहुवाक निवासी प्रणव प्रशान्त झा उत्कृष्ट प्रदर्शन करैत स्वर्ण पदक जीतलनि अछि । राष्ट्रिय माध्यमिक विद्यालय, मुसहरनियामे कक्षा ५ मे अध्ययनरत प्रणव प्रतियोगितामे अपन प्रभावशाली खेल कौशलक प्रदर्शन करैत प्रथम स्थान हासिल कएलनि ।
इन्द्रकुमार झा (मधेशानन्द)क साहिँला पुत्र प्रणव प्रशान्त झा प्रतियोगिताक अन्डर–१८ केजी तौल समूहमे सहभागी भेल छलाह। कम उमेरमे सेहो ओ प्रतियोगितामे आत्मविश्वासक संग खेलैत प्रतिद्वन्द्वीकेँ लगातार चुनौती देलनि । प्रतियोगिताक प्रथम राउन्डमे प्रणव १५–० अंकक अन्तरसँ शानदार जीत दर्ज कएलनि।

प्रथम राउन्डक सफलताक बाद दोसर राउन्डमे सेहो हुनकर उत्कृष्ट प्रदर्शन जारी रहल । दोसर राउन्डमे ओ २०–० अंकक एकपक्षीय जीत हासिल कऽ अपन खेल प्रतिभाक परिचय देलनि। लगातार दू राउन्डमे प्रभावशाली प्रदर्शनक आधारपर प्रणव प्रतियोगिताक शीर्ष स्थान पर पहुँचैत स्वर्ण पदक अपन नाम कऽ लेलनि। प्रणवक एहि उपलब्धिसँ परिवार, विद्यालय तथा स्थानीय खेलप्रेमीमे खुशीक माहौल अछि ।

कम उमेरमे अन्तर्राष्ट्रिय स्तरक प्रतियोगितामे उत्कृष्ट प्रदर्शन करैत स्वर्ण पदक जीतनाइ क्षेत्रक लेल सेहो गौरवक विषय बनल अछि । स्थानीय खेलप्रेमीसभ कहलनि जे प्रणव जेकाँ प्रतिभाशाली बाल खेलाड़ीकेँ उचित प्रशिक्षण, खेल सामग्री आ आवश्यक अवसर उपलब्ध कराओल गेल तँ ओ आगाँ चलि प्रदेश आ देशक प्रतिनिधित्व करैत पैघ उपलब्धि हासिल कऽ सकैत छथि । प्रणवक स्वर्ण पदक जीतलापर परिवारजन, विद्यालयक शिक्षक तथा स्थानीय बासिन्दासभ हुनका बधाइ दैत उज्ज्वल खेल भविष्यक शुभकामना देलनि।