मैथिली साहित्यक दिग्गज साहित्यकार डा. रेवतीरमण लालक निधन

57 मिनट पहिले प्रकाशित

Smrititimes

जनकपुरधाम
२१ गते भादब । मैथिली साहित्य जगतक वरिष्ठ साहित्यकार, लेखक तथा चिन्तक डा. रेवतीरमण लालक निधन भेल अछि । हुनकर निधनसँ मैथिली साहित्य क्षेत्रमे अपूरणीय क्षति भेल अछि । ८३ वर्षक उमेरमे डा. लालक निधन जनकपुरधामस्थित रामजानकी अस्पतालमे भादब २० गते साँझ करीब ५ः३० बजे भेल पारिवारिक स्रोतले जानकारी देलक अछि । स्वर्गीय डा. लाल जनकपुरधाम उपमहानगरपालिका–११ स्थित अपन निवासमे रहैत छलाह। हुनकर जन्म २ मार्च १९४३ ईस्वीमे धनुषाक साबिक देवडिहा गाविस–३, खिरखिरिया गाममे भेल छलनि। मैथिली विषयमे पीएच.डी. उपाधि प्राप्त कएने डा. लाल नेपाल राष्ट्र बैंकक सेवासँ अवकाश प्राप्त कर्मचारी छलाह ।

मैथिली साहित्यक विभिन्न विधामे हुनकर महत्वपूर्ण योगदान रहल अछि । कथा, कविता, गीत, लेख, पटकथा, साक्षात्कार, यात्रा वृत्तान्त तथा लोकसाहित्यलगायतक विधामे हुनक कलम सक्रिय रहल । हुनकर पहिल प्रकाशित मैथिली रचना ‘सरस्वती वन्दना’ गीत सन् १९६० मे प्रकाशित भेल छल । हुनकर प्रमुख मैथिली कृतिमे ‘साक्षात्कार’ (साहित्यकारसभक अन्तरवार्ता), ‘माधव नहि अएला मधुपुरसँ’ (कथा संग्रह), ‘हमर विदेश भ्रमण’ (यात्रा वृत्तान्त), ‘महाकवि विद्यापति’ (पटकथा) आ ‘खिस्सा पिहानी’ (लोककथा) उल्लेखनीय अछि । एहिक अतिरिक्त ‘धनुषाधाम और मणिमण्डप’ पर्यटनसम्बन्धी कृति सेहो प्रकाशित अछि ।

ओ मिथिलाक गौरवमय ईतिहासक पैघ स्तम्भ विद्यापति सिरियलके रचयिता सेहो छलाह । ओ मैथिली त्रैमासिक ‘नैमिकानन’क सम्पादकक रूपमे सेहो योगदान देने छलाह। हुनकर कतेको रचना विद्यालय आ महाविद्यालयक पाठ्यक्रममे समावेश अछि । डा. लाल मैथिली साहित्यसँ जुड़ल विभिन्न संस्थामे महत्वपूर्ण भूमिकामे रहलाह। ओ विविधा मैथिली मञ्चक संस्थापक सचिव, मैथिली साहित्य परिषद्क सदस्य,मैथिली साहित्य समाजक अभिभावक तथा मैथिली साहित्यकार सभाक सलाहकार छलाह।
साहित्य क्षेत्रमे उल्लेखनीय योगदानक लेल हुनका वैदेही प्रतिभा पुरस्कार, त्रिमूर्ति पुरस्कार, मिथिला रत्न, ज्योतिरीश्वर साहित्य सम्मान, नेपाल सरकारक प्रादेशिक प्रतिभा पुरस्कार तथा नेपाल विद्यापति मैथिली भाषा–साहित्य पुरस्कार (मैथिलीक नोबेल प्राइज) सहित अनेक सम्मान प्राप्त भेल छल। पारिवारिक स्रोतक अनुसार हुनकर पार्थिव शरीरक अन्त्येष्टि आइ ११ बजेबाद जनकपुरधामस्थित स्वर्गद्वारमे कएल जाएत। हुनकर निधनपर मैथिली साहित्यकार, स्रष्टा तथा साहित्यप्रेमीसभमे गहिर शोकक लहर अछि।