गोबरौरामा गौरेश्वर टोल विकास संस्था गठन

2 महीना पहिले प्रकाशित

Smrititimes

जनकपुरधाम, बैसाख २९ — मटिहानी नगरपालिका वडा नं. ५ स्थित गोबरौरामा स्थानीय विकास र समुदायिक एकतालाई सुदृढ बनाउने उद्देश्यसहित “गौरेश्वर टोल विकास संस्था” गठन गरिएको छ ।

वडा अध्यक्ष मिश्री नायकको अध्यक्षता तथा वडा सचिव दिनेश यादवको उपस्थितिमा सम्पन्न भेलाले ९ सदस्यीय समिति सर्वसम्मत रूपमा चयन गरेको हो । समितिको अध्यक्षमा संजय नायक, उपाध्यक्षमा रामप्रसाद ठाकुर, सचिवमा मनोहर महतो तथा कोषाध्यक्षमा निरन्जन देवी चयन भएका छन् । सदस्यहरूमा सिहन्ती देवी, प्रमिला देवी, अमदा देवी, श्रीचन साह र देवेन्द्र यादव रहेका छन् ।

सपोर्ट नेपालका महोत्तरी जिल्ला कार्यक्रम संयोजक प्रकाश ठाकुरका अनुसार स्थानीय सरकार सञ्चालन ऐन २०७४ अन्तर्गत विभिन्न समुदायका स्थानीयवासीको भेलाबाट संस्था गठन गरिएको हो । संस्था सपोर्ट नेपालको आयोजना तथा कुर्वे उस्ट्रोको सहयोगमा सञ्चालित सशक्तिकरण परियोजनाअन्तर्गत गठन गरिएको बताइएको छ ।

संस्था गठनपछि पदाधिकारीहरूसँग आगामी कार्ययोजना तथा संस्थाको वैधानिक प्रक्रियाका विषयमा छलफल गरिएको सपोर्ट नेपाल धनुषाका कार्यक्रम संयोजक शत्रुघन महतोले जानकारी दिए । उनका अनुसार संस्थाको कार्यविधि तयार गरी सम्बन्धित पालिकाबाट स्वीकृत गराउने, विधान निर्माण तथा पारित गर्ने र वडा कार्यालयको सिफारिसपछि पालिकामा दर्ता गराउने निर्णय बैठकले गरेको छ ।

कार्यक्रममा सपोर्ट नेपालका गंगाप्रसाद साह, समिन घिमिरेसहित स्थानीय बासिन्दाको उल्लेखनीय सहभागिता रहेको थियो ।

नवगठित टोल विकास संस्थाले समुदायमा शान्ति, सद्भाव, सुरक्षा र सहिष्णुता कायम गर्न सहयोग गर्ने, विकास निर्माणका योजना तर्जुमा तथा अनुगमनमा सहकार्य गर्ने, धार्मिक तथा सांस्कृतिक कार्यक्रम व्यवस्थापन गर्ने, सार्वजनिक कामको निगरानी गर्ने लगायतका २९ प्रकारका जिम्मेवारी निर्वाह गर्ने जनाइएको छ ।

स्थानीयस्तरमा विकास र सहकार्यलाई प्रभावकारी बनाउन संस्था वडा कार्यालयमा दर्ता गरी वडासँग समन्वय गरेर अगाडि बढ्ने निर्णयसमेत गरिएको आयोजकले जनाएको छ ।