जनकपुरधामको सस्ता बजारमा संयुक्त अनुगमन, अखाद्य रङ प्रयोगको आशंकामा हवाई मिठाई नष्ट

55 मिनट पहिले प्रकाशित

Smrititimes

जनकपुरधाम, २८ असोज। जनकपुरधामको ऐतिहासिक राम मन्दिर क्षेत्रमा सञ्चालन भइरहेको सस्ता बजारमा बुधबार विभिन्न सरोकारवाला निकायले संयुक्त रूपमा खाद्य पदार्थको गुणस्तर तथा स्वच्छतासम्बन्धी अनुगमन गरेका छन्।

जिल्ला प्रशासन कार्यलय धनुषा,उपभोक्ता हित संरक्षण मञ्च, खाद्य प्रविधि तथा गुण नियन्त्रण कार्यालय, जनकपुरधाम उद्योग वाणिज्य संघ र सुरक्षा निकायका प्रतिनिधिहरूको संयुक्त सहभागितामा बजारमा बिक्री वितरण भइरहेका खाद्य पदार्थको गुणस्तर, सरसफाइ तथा उपभोक्ताको स्वास्थ्य सुरक्षालाई केन्द्रमा राखेर अनुगमन गरिएको हो।

अनुगमनका क्रममा बजारमा सञ्चालित आइसक्रिम, भुजिया, दालमोट, खाजा तथा नास्तालगायत विभिन्न खाद्य सामग्री बिक्री गर्ने स्टलहरूको निरीक्षण गरिएको थियो। खाद्य प्रविधि तथा गुण नियन्त्रण कार्यालयका कर्मचारीहरूले खाद्य सामग्रीको अवस्था, गुणस्तर तथा स्वच्छताका विषयमा स्थलगत निरीक्षण गरेका थिए।

निरीक्षणका क्रममा अधिकांश स्टलमा बिक्रीका लागि राखिएका खाद्य सामग्रीको अवस्था सन्तोषजनक पाइएको अनुगमन टोलीले जनाएको छ। यद्यपि, केही खाद्य पदार्थको गुणस्तर र उपभोक्ताको स्वास्थ्यमा पर्न सक्ने असरका विषयमा विशेष चासो व्यक्त गरिएको थियो।

बालबालिकाले रुचाउने हवाई मिठाई नष्ट

अनुगमनका क्रममा विशेषगरी बालबालिकाले अत्यधिक रुचाउने हवाई मिठाई (कटन क्यान्डी) को बिक्री वितरणप्रति अनुगमन टोलीले गम्भीर चासो देखाएको थियो।

हवाई मिठाईलाई आकर्षक बनाउन विभिन्न प्रकारका कृत्रिम रङ तथा रासायनिक पदार्थ प्रयोग हुन सक्ने र त्यस्ता पदार्थ स्वास्थ्यका लागि हानिकारक हुन सक्ने भन्दै अनुगमन टोलीले बजारमा बिक्रीका लागि राखिएका हवाई मिठाई नष्ट गरेको हो।

विशेषगरी खाद्य पदार्थमा प्रयोग गर्न अनुमति नभएका रङ तथा रासायनिक पदार्थको प्रयोगले बालबालिकाको स्वास्थ्यमा दीर्घकालीन असर पार्न सक्ने भएकाले यस्ता सामग्रीको बिक्री वितरणमा कडाइ गर्नुपर्नेमा सरोकारवालाहरूले जोड दिएका छन्।

कतिपय अखाद्य रङ तथा रासायनिक पदार्थले गम्भीर स्वास्थ्य जोखिम निम्त्याउन सक्ने भए पनि अनुगमनमा भेटिएका हवाई मिठाईमा कुन रसायन प्रयोग भएको थियो भन्ने विषयमा प्रयोगशाला परीक्षणबाट पुष्टि भएको विवरण भने प्राप्त भएको छैन।

उद्योग वाणिज्य संघका अध्यक्ष भण्डारीको सक्रिय सहभागिता

संयुक्त अनुगमनमा जनकपुरधाम उद्योग वाणिज्य संघका अध्यक्ष सुरेन्द्र भण्डारीको विशेष उपस्थिति तथा सक्रिय सहभागिता रहेको थियो। भण्डारीको अगुवाइमा समेत बजारका विभिन्न स्टलहरूको निरीक्षण गरिएको थियो।

सस्ता बजारमा आउने उपभोक्तालाई स्वच्छ, सुरक्षित तथा गुणस्तरीय खाद्य सामग्री उपलब्ध गराउनु आवश्यक रहेको भन्दै अनुगमन टोलीले व्यापारीहरूलाई खाद्य स्वच्छता र गुणस्तरमा विशेष ध्यान दिन आग्रह गरेको थियो।

चाडपर्व तथा विशेष अवसरमा सञ्चालन हुने सस्ता बजारमा ठूलो संख्यामा सर्वसाधारणको उपस्थिति रहने भएकाले यस्ता बजारमा खाद्य सुरक्षासम्बन्धी अनुगमनलाई प्रभावकारी बनाउनुपर्ने आवश्यकता औँल्याइएको छ।

उपभोक्ताको स्वास्थ्यसँग प्रत्यक्ष सरोकार राख्ने खाद्य पदार्थको गुणस्तरमा कुनै पनि प्रकारको लापरबाही हुन नदिन सम्बन्धित निकायको नियमित निगरानी आवश्यक रहेको सरोकारवालाहरूको भनाइ छ।

यस प्रकारको संयुक्त अनुगमनले बजारमा गुणस्तरीय खाद्य सामग्रीको बिक्री वितरणलाई प्रोत्साहन गर्नुका साथै उपभोक्तालाई अखाद्य तथा स्वास्थ्यका लागि हानिकारक वस्तुको उपभोगबाट जोगाउन महत्त्वपूर्ण भूमिका खेल्ने विश्वास गरिएको छ।सो अनुगमनमा धनुषाका सहायक प्रमुख जिल्ला अधिकारी चिरञ्जीवी भट्टराई,जनकपुरधाम उद्योग वाणिज्य संघका अध्यक्ष सुरेन्द्र भण्डारी,खाद्य प्रविधि तथा गुण नियन्त्रण कार्यालय जनकपुरका खाद्य अनुसन्धान अधिकारी रौशन साह,खाद्य निरीक्षण अधिकारी सहन्सा कुमार मेहता,उपभोक्ता हित संरक्षण मञ्चका केन्द्रीय सदस्य बटुकनाथ झा लगायतका सहभागिता रहेको थियो ।