नगराइन–२ जटहीको पोखरी निर्माणमा गुणस्तरहीन सामग्री प्रयोगको आशंका, प्राविधिक परीक्षण गर्न माग

57 मिनट पहिले प्रकाशित

Smrititimes

जनकपुरधाम
असोज १५ गते ।
धनुषाको नगराइन नगरपालिका–२ जटहीमा सञ्चालित पोखरीको घाट निर्माण कार्यमा गुणस्तरहीन इँटा तथा अन्य निर्माण सामग्री प्रयोग भइरहेको आशंका भएपछि स्थलगत अनुगमन र प्राविधिक परीक्षण गर्न सिफारिस गरिएको छ।
नगराइन नगरपालिका–२ का वडा अध्यक्ष रामपरी देवीले २०८३ असोज १४ गते जिल्ला प्रशासन कार्यालय, धनुषालाई पत्र पठाउँदै निर्माण कार्यमा गुणस्तरहीन सामग्री प्रयोग भइरहेको भन्ने गुनासो तथा जानकारी प्राप्त भएको जनाएको हो। सार्वजनिक स्रोतबाट निर्माण भइरहेको आयोजना भएकाले स्वीकृत प्राविधिक मापदण्ड र सम्झौताअनुसार सामग्री प्रयोग भए–नभएको तत्काल परीक्षण गर्न वडा कार्यालयले आग्रह गरेको छ ।
वडा कार्यालयका अनुसार उक्त निर्माण कार्यको ठेक्का सावित्री निर्माण सेवा, जनकपुर–९, धनुषा ले लिएको छ। आयोजना स्थलमा राखिएको सूचना पाटीअनुसार सम्झौता मिति २०८२÷११÷०५ रहेको छ। सम्झौता रकम मूल्य अभिवृद्धि करसहित २ करोड ३६ लाख ६८ हजार ३३१ रुपैयाँ १८ पैसा रहेको छ भने आयोजनाको लागत अनुमान २ करोड ९८ लाख ८८ हजार ८८८ रुपैयाँ २७ पैसा रहेको उल्लेख छ । निर्माणस्थलमा प्रयोग भएका इँटा, बालुवा, गिट्टी, सिमेन्टलगायत सामग्रीको गुणस्तर परीक्षण गर्न वडा कार्यालयले माग गरेको छ। साथै, स्थलगत निरीक्षण तथा प्राविधिक अनुगमनमार्फत निर्माण कार्य सम्झौता तथा स्वीकृत प्राविधिक मापदण्डअनुसार भए–नभएको यकिन गर्न आग्रह गरिएको छ।

वडा कार्यालयले निर्माण सामग्री वा काम सम्झौता र प्राविधिक मापदण्डविपरीत रहेको पुष्टि भएमा प्रचलित कानुन तथा सम्झौताबमोजिम सुधार, पुनःनिर्माण तथा आवश्यक कारबाही अघि बढाउनसमेत अनुरोध गरेको छ ।
त्यसैगरी, गुणस्तर परीक्षण तथा आवश्यक जाँचबुझ पूरा नभएसम्म निर्माण कार्यको मापन तथा भुक्तानी प्रक्रिया अघि नबढाउन वडा कार्यालयले आग्रह गरेको छ ।वडा कार्यालयको पत्रपछि जिल्ला प्रशासन कार्यालय, धनुषाले सम्बन्धित संघीय शहरी विकास तथा भवन निर्माण आयोजना कार्यालय, धनुषा लाई पत्राचार गर्दै निर्माणस्थलमा तत्काल प्राविधिक टोली खटाएर निर्माण सामग्री तथा सम्पन्न कामको गुणस्तर परीक्षण गर्न अनुरोध गरेको छ । अब हुने प्राविधिक परीक्षण र स्थलगत अनुगमनपछि निर्माणमा प्रयोग भएका सामग्री तथा सम्पन्न काम स्वीकृत प्राविधिक मापदण्ड र सम्झौताअनुसार भए–नभएको यकिन हुनेछ। परीक्षणबाट गुणस्तरहीन सामग्री प्रयोग भएको वा निर्माण मापदण्डविपरीत भएको पुष्टि भएमा सम्बन्धित पक्षमाथि प्रचलित कानुन तथा सम्झौताबमोजिम प्रक्रिया अघि बढ्न सक्ने जनाइएको छ।