राजर्षि जनक विद्यालयमा बालविवाहविरुद्ध सचेतना कार्यक्रम सम्पन्न

4 महीना पहिले प्रकाशित

Smrititimes

जनकपुरधाम
असार १० गते ।
बालविवाहविरुद्ध जनचेतना अभिवृद्धि गर्ने उद्देश्यले जनकपुरधाम–१३ स्थित राजर्षि जनक विद्यालयमा सचेतनामूलक कार्यक्रम बुधबार सम्पन्न गरिएको छ । शान्ति पुनस्र्थापना गृहको आयोजनामा तथा जिल्ला प्रहरी कार्यालय धनुषाको समन्वयमा आयोजित कार्यक्रममा विद्यार्थी, शिक्षक तथा सरोकारवालाहरूको सहभागिता रहेको थियो ।

कार्यक्रममा शान्ति पुनस्र्थापना गृह धनुषाकी प्रमुख रिना झाले बालविवाह समाजका लागि गम्भीर सामाजिक समस्या भएको उल्लेख गर्दै यसको अन्त्यका लागि सबै पक्ष एकजुट हुनुपर्ने बताउनुभयो। उहाँले बालबालिकाको शिक्षा, स्वास्थ्य तथा उज्ज्वल भविष्य सुनिश्चित गर्न बालविवाहविरुद्ध सक्रिय भूमिका निर्वाह गर्न सहभागीहरूलाई आग्रह गर्नुभयो । विद्यालयका प्रधानाध्यापक विनोद कुमार साहले विद्यालयस्तरबाटै बालविवाहविरुद्ध चेतना फैलाउन आवश्यक रहेको बताउँदै यस्ता कार्यक्रमले विद्यार्थीहरूमा सकारात्मक सोच र सामाजिक जिम्मेवारीको भावना विकास गर्न सहयोग पुग्ने विश्वास व्यक्त गर्नुभयो ।

त्यसैगरी शिक्षक दिपिका कार्कीले बालविवाहका कारण बालबालिकाको शिक्षा, स्वास्थ्य तथा व्यक्तिगत विकासमा नकारात्मक असर पर्ने भएकाले यसको रोकथामका लागि अभिभावक, शिक्षक र समुदाय सबैको भूमिका महत्वपूर्ण रहने बताउनुभयो । जिल्ला प्रहरी कार्यालय धनुषाका प्रहरी सहायक निरीक्षक भरत ठाकुरले बालविवाह कानुनी रूपमा दण्डनीय अपराध भएको जानकारी गराउँदै यस्ता गतिविधि रोक्न प्रहरी प्रशासन प्रतिबद्ध रहेको बताउनुभयो। उहाँले बालविवाहका घटनाबारे जानकारी भएमा सम्बन्धित निकायलाई तत्काल सूचित गर्न आग्रह गर्नुभयो । कार्यक्रममा बालविवाहका सामाजिक, शैक्षिक, स्वास्थ्य तथा कानुनी प्रभावबारे जानकारी गराइएको थियो। सहभागीहरूले बालविवाहमुक्त समाज निर्माणका लागि आफूहरू सक्रिय रूपमा लाग्ने प्रतिबद्धता व्यक्त गरेका थिए।