धनौजी गाउँपालिकामा ३० जना अपाङ्गता भएका व्यक्तिका लागि सीपमूलक तालिम सम्पन्न

1 महीना पहिले प्रकाशित

Smrititimes

जनकपुरधाम
असार २२ गते
धनुषाको धनौजी गाउँपालिका वडा नं. ३ स्थित राष्ट्रिय आधारभूत विद्यालय झोझीकटैयामा अपाङ्गता भएका व्यक्तिहरूलाई लक्षित गरी सञ्चालन गरिएको चारदिने सीपमूलक तालिम तथा सम्मान कार्यक्रम सम्पन्न भएको छ। समाजमा अपाङ्गता भएका व्यक्तिहरूको आत्मनिर्भरता, सीप विकास, आत्मविश्वास अभिवृद्धि तथा आर्थिक–सामाजिक सशक्तीकरण गर्ने उद्देश्यले आयोजित तालिम असार १९ गतेदेखि २२ गतेसम्म सञ्चालन गरिएको थियो ।
समाज विकास मञ्चको आयोजनामा तथा धनौजी गाउँपालिकाको सहयोगमा सञ्चालन भएको तालिममा ३० जना अपाङ्गता भएका व्यक्तिको सक्रिय सहभागिता रहेको थियो। चार दिनसम्म सञ्चालन गरिएको तालिममा सहभागीहरूलाई आयआर्जन, आत्मनिर्भरता, व्यक्तिगत क्षमता विकास, स्वरोजगारका सम्भावना, उद्यमशीलता, प्रभावकारी सञ्चार, सामाजिक सहभागिता तथा आत्मविश्वास अभिवृद्धिसम्बन्धी विभिन्न विषयमा प्रशिक्षण प्रदान गरिएको आयोजकले जनाएको छ । तालिमको प्रशिक्षण तथा सहजीकरण समाज विकास मञ्चका अध्यक्ष सितेश कुमार मण्डलले गर्नुभएको थियो। उहाँले अपाङ्गता कुनै कमजोरी नभई फरक क्षमता भएको अवस्था भएको उल्लेख गर्दै उचित अवसर, सीप र प्रोत्साहन प्राप्त भएमा अपाङ्गता भएका व्यक्तिहरूले पनि समाजको विकासमा महत्वपूर्ण योगदान दिन सक्ने बताउनुभयो। उहाँले तालिमबाट प्राप्त ज्ञान र सीपलाई व्यवहारमा उतारेर आत्मनिर्भर बन्न सहभागीहरूलाई आग्रह गर्नुभयो ।
तालिम समापन तथा सम्मान कार्यक्रममा धनौजी गाउँपालिकाका अध्यक्ष राजकुमार साह प्रमुख अतिथिका रूपमा सहभागी हुनुभएको थियो । उहाँले तालिम सफलतापूर्वक पूरा गरेका सबै ३० जना सहभागीलाई प्रमाणपत्र वितरण गर्दै सम्मान गर्नुभयो । सो अवसरमा बोल्दै अध्यक्ष साहले यस्ता सीपमूलक तालिमले अपाङ्गता भएका व्यक्तिहरूमा केही नयाँ गर्ने हौसला र आत्मविश्वास बढाएको विश्वास व्यक्त गर्नुभयो । उहाँले अपाङ्गता भएका व्यक्तिहरूलाई समाजको मूलधारमा सहभागी गराउन स्थानीय सरकार प्रतिबद्ध रहेको बताउँदै आगामी दिनमा पनि उनीहरूको हित, अधिकार, क्षमता विकास तथा स्वरोजगार प्रवद्र्धनका लागि यस्ता कार्यक्रमलाई निरन्तरता दिइने प्रतिबद्धता व्यक्त गर्नुभयो । “समावेशी विकासका लागि अपाङ्गता भएका व्यक्तिहरूको सशक्त सहभागिता आवश्यक छ। स्थानीय सरकारले उनीहरूको क्षमता अभिवृद्धि र जीवनस्तर सुधारका कार्यक्रमलाई प्राथमिकतामा राख्नेछ,“ अध्यक्ष साहले भन्नुभयो ।
समापन कार्यक्रममा गाउँपालिकाका जनप्रतिनिधि, कर्मचारी, स्थानीय बुद्धिजीवी, अभिभावक तथा स्थानीयवासीहरूको उल्लेखनीय सहभागिता रहेको थियो। सहभागीहरूले तालिमले आफ्नो सोच, आत्मविश्वास र केही गर्ने इच्छाशक्ति बढाएको अनुभव सुनाएका थिए। उनीहरूले सीपमूलक तालिमले आत्मनिर्भर बन्ने मार्ग देखाएको भन्दै यस्ता कार्यक्रमलाई निरन्तर सञ्चालन गर्न स्थानीय सरकार र आयोजक संस्थासँग आग्रह गरेका थिए । कार्यक्रममा बोल्ने वक्ताहरूले अपाङ्गता भएका व्यक्तिहरूलाई दया वा सहानुभूतिको दृष्टिले मात्र नभई अधिकार र क्षमताका आधारमा हेर्नुपर्ने आवश्यकता औँल्याए। उनीहरूलाई शिक्षा, सीप, रोजगारी र सामाजिक अवसरमा समान पहुँच सुनिश्चित गर्न सके मात्र समावेशी समाज निर्माण सम्भव हुने धारणा व्यक्त गरिएको थियो । आयोजक संस्था समाज विकास मञ्चले अपाङ्गता भएका व्यक्तिहरूको अधिकार संरक्षण, क्षमता विकास, सामाजिक समावेशीकरण तथा आर्थिक सशक्तीकरणका क्षेत्रमा निरन्तर काम गर्दै आएको जनाएको छ। संस्थाका अध्यक्ष सितेश कुमार मण्डलले स्थानीय सरकारसँगको सहकार्यमा आगामी दिनमा पनि यस्ता सीपमूलक तथा क्षमता अभिवृद्धिका कार्यक्रम सञ्चालन गरिने जानकारी दिनुभयो । चार दिनसम्म सञ्चालन भएको तालिमले सहभागीहरूमा नयाँ सीप सिक्ने अवसर मात्र प्रदान नगरी आत्मविश्वास, सामाजिक सहभागिता र आत्मनिर्भरताप्रतिको सकारात्मक सोचसमेत विकास गरेको आयोजकको निष्कर्ष रहेको छ। स्थानीय तह र सामाजिक संस्थाबीचको सहकार्यमा सञ्चालन गरिएका यस्ता कार्यक्रमले अपाङ्गता भएका व्यक्तिहरूको जीवनस्तर सुधार, सामाजिक सम्मान अभिवृद्धि तथा समावेशी विकासलाई थप सुदृढ बनाउने अपेक्षा गरिएको छ ।