युवाको नाममा विनियोजित बजेटको विवरण माग गर्दै RTI दर्ता

59 मिनट पहिले प्रकाशित

Smrititimes

जनकपुरधाम

भदौ ९ गते। जनकपुरधाम उपमहानगरपालिकामा युवा लक्षित नीति, कार्यक्रम, बजेट तथा त्यसको कार्यान्वयनसम्बन्धी विवरण माग गर्दै युवा अभियन्ता निशान्त ओझाले सूचनाको हक (RTI) अन्तर्गत निवेदन दर्ता गरेका छन्।

ओझाले युवाका लागि छुट्याइएको बजेट, सञ्चालन गरिएका कार्यक्रम तथा ती कार्यक्रमको कार्यान्वयन अवस्थाबारे आवश्यक सूचना सार्वजनिक हुनुपर्ने बताएका छन्। उनका अनुसार सार्वजनिक स्रोतबाट खर्च हुने बजेटको विवरण नागरिकले सहज रूपमा जान्न पाउने अधिकार राख्छन्।

“युवाको नाममा बजेट छ भने, विवरण पनि सार्वजनिक हुनुपर्छ,” ओझाले भनेका छन्।

उनले आफूले व्यक्तिगत चासोका कारण नभई सार्वजनिक स्रोतको पारदर्शिता, जवाफदेहिता र युवाको अधिकार सुनिश्चित गर्ने उद्देश्यले सूचना माग गरेको स्पष्ट पारेका छन्।

युवा लक्षित कार्यक्रमका लागि विनियोजित बजेट कहाँ, कसरी र कति खर्च भइरहेको छ भन्ने विषयमा सार्वजनिक चासो बढिरहेका बेला ओझाले सूचना माग गर्दै प्रक्रिया अघि बढाएका हुन्।

उनले नागरिक तथा युवाहरूलाई सार्वजनिक निकायसँग सूचना माग्न, प्रश्न गर्न र सार्वजनिक स्रोतको प्रयोगबारे जवाफदेहिता खोज्न आग्रह गरेका छन्।

“सूचना मागौँ। प्रश्न गरौँ। जवाफदेहिता खोजौँ,” ओझाको भनाइ छ।