राष्ट्रिय मुक्ति पार्टीलाई ठुलो झटका धनुषाका अधिकांश नेताले दिए राजिनामा

7 महीना पहिले प्रकाशित

Smrititimes

जनकपुरधाम
माघ ११ ।
प्रतिनिधि सभाको निर्वाचनका समयमा राजेन्द्र महतो नेतृत्वको राष्ट्रिय मुक्ति पार्टीलाई धनुषामा ठुलो झटका लागेको छ । ती पार्टीका केन्द्रीय सचिब संजय कुमार चौधरी, केन्द्रीय अनुशासन विभाग अध्यक्ष संजय कुमार सिँह, केन्द्रीय सदस्य विजय कुमार राय,संजय गाडिया,अशोक ठाकुर,गुलो देवी पासमान,नितु यादव पासमान,राष्ट्रिय परिषद सदस्य राजाराम कापर, विजय नायक, सरगुन पासमान, जिल्ला कार्य समितिका उपाध्यक्ष शंकर कुमार पासमान,विरेन्द्र पासमान,जिल्ला सचिव जीवन कुमार यादव,सहसचिव धन्जीत मंडल लगायतका दुई दर्जन भन्दा बढी केन्द्रिय तथा जिल्ला स्तरीय नेताहरुले एकै दिन पार्टीबाट राजीनामा दिएका छन्।

विगत केहि दिन पहिला केन्द्रिय सचिब संजय कुमार चौधरी तथा केन्द्रीय अनुशासन विभाग अध्यक्ष संजय कुमार सिँहले पार्टी परित्याग गर्ने घोषणा समाजिक संजाल मार्फत गरेका थिए । विज्ञप्तीमा भनिएको छ,‘ नेपाल आज गम्भीर राजनीतिक सङ्कट र दिशाहीनताको अवस्थामा पुगेको यथार्थलाई आत्मसात् गर्दै, दलगत संकीर्णता, अवसरवाद र व्यक्तिकेन्द्रित राजनीतिले मुलुक र जनतालाई थप निराशातर्फ धकेलेको निष्कर्षमा हामी पुगेका छौं।

यस्तो अवस्थामा पार्टीगत आवरणभन्दा माथि उठी देश, जनता, विधिको शासन तथा वृहत्तर लोकतान्त्रिक राजनीतिक एकता नै वर्तमान समयको अपरिहार्य आवश्यकता हो भन्ने ठोस मान्यताका साथ, राजेन्द्र महतोको नेतृत्वमा रहेको “राष्ट्रिय मुक्ति पार्टी नेपाल” परित्याग गर्ने निर्णयमा हामी तपसीलमा उल्लेखित नेता ड्ड तथा कार्यकर्ताहरू सामूहिक रूपमा पुगेका छौँ।
अब हामी यथास्थितिवादी, विभाजनकारी र जनआकांक्षाविरोधी राजनीतिबाट अलग हुँदै, देशको सार्वभौमिकता, लोकतन्त्र र जनअधिकारको पक्षमा दृढतापूर्वक उभिने नयाँ राजनीतिक यात्राको घोषणा गर्दछौँ ।

उक्त यात्रा केही दिनभित्र औपचारिक रूपमा सार्वजनिक गरिने जानकारी सम्बन्धित सबै सरोकारवाला तथा आम जनसमुदायलाई अवगत गराउन यो संयुक्त विज्ञप्ति जारी गरिएको छ ।’ सो पार्टीबाट अलग भएर राजीनामा दिएकाहरु उपेनद्र यादब अध्यक्ष रहेको जसपा नेपालमा प्रवेश गर्ने स्रोतले जनाएको छ । यसरी समुहगत रुपमा राजीनामा आएपछि धनुषामा राष्ट्रिय मुक्ति पार्टी कमजोर बनेका छन् ।