न्याय क्षेत्रमे निष्पक्षता, स्वच्छता, पारदर्शीता जरुरीः प्रधानन्यायाधीश राउत

6 महीना पहिले प्रकाशित

Smrititimes

जनकपुरधाम, २५ अगहनः प्रधानन्यायाधीश प्रकाशमान सिंह राउत अदालत तथा न्याय क्षेत्रमे निष्पक्षता, स्वच्छता, पारदर्शीता जरुरी भेल बतौलैन अइछ । नेपाल बार एशोसिएसनके आयोजनमे जनकपुरधाममे सुरु भेल ५१म कार्यकारिणी परिषद् बैसार तथा मानव अधिकारसम्बन्धी राष्ट्रिय गोष्ठीके बुधदिन उद्घाटन करैत ओ मानव अधिकार आ न्याय एक दोसरसँ जुड़ल विषय भेलाक कारण न्याय बिनाके मानव अधिकारक कल्पना नै कएल जा सकबाक बतौलैन ।

वर्तमान राजनीतिक परिस्थितिमे मानव अधिकारक रक्षा केनाइ चुनौतीपूर्ण काज भेल बतबैत प्रधानन्यायाधीश राउत मानव अधिकार बिना सुशासन तथा न्यायके बात केनाइ संभव नै भेल से धारणा व्यक्त केलैन । जेनजी आन्दोलनक क्रममे सर्वोच्च तथा अन्य अदालतसहित ९ लाख मिसिलसभ जराओल गेल ओ जानकारी देलैन ।

जइके कारण न्याय क्षेत्रमे बड़का क्षति भेल हुनक कहब छलैन । महान्यायधिवक्ता सविता बराल मानव अधिकार सुनिश्चित भेल अवस्थामे देशमे सुशासन स्थापित हएत आ ओइसँ न्याय निरुपणमे सहयोग होबाक बतौलैन । मानव अधिकारक लेल सुशासन पहिल सर्त भेल बतबैत ओ अइ लेल न्याय क्षेत्रमे पारदर्शीता तथा जवाफदेही बनबाक आवश्यक भेल बतौलैन । नेपाल बार एशोसिएसनक केन्द्रीय अध्यक्ष प्राध्यापक डा. विजय प्रसाद मिश्र सुशासन तथा विधिके शासन बिना मानव अधिकारक कल्पना नै कएल जा सकैय कहैत जेनजी पुस्ताके आन्दोलनक भावनाकेँ वैधानिकीकरण करबाक लेल संविधान संशोधन जरुरी भेल उल्लेख केलैन । नेपाल बार एशोसिएसनक पूर्वअध्यक्ष एवं वरिष्ठ अधिवक्ता शम्भु थापा परम्परागत मूल्य आ मान्यतासँ मानव अधिकारक रक्षा केनाइ कठिन होबाक बतौलैन ।

परिषद् बैसारमे ७७ जिलाक परिषद् सदस्यसभ, जिला अध्यक्ष तथा सचिवसहित करिब ५ सओ कानुन व्यवसायीके सहभागिता अइछ । जनकपुर घोषणापत्र जारी क बैसार आइ समापन होबाक कार्यक्रम भेल वरिष्ठ अधिवक्ता श्याम कुमार मिश्र जानकारी देलैन ।