विवादित सतलोक आश्रमक गतिविधिपर रोक

1 घन्टा पहिले प्रकाशित

Smrititimes

जनकपुरधाम, माघ ३ गते ।

धनुषाक मिथिला नगरपालिका–२ मे रहल सतलोक आश्रमक गतिविधिपर नगरपालिकाले रोक लगा देलक अछि। हालिया समयमे विवादित बनल पूर्णब्रह्म कबीर उपासक समाज नेपाल (सतलोक आश्रम) द्वारा सञ्चालित गतिविधिसभकेँ कानून विपरीत ठहर कए नगरपालिकाले तत्काल रोक लगेनाय निर्देश देलक अछि।

मिथिला नगरपालिकाक प्रमुख महेन्द्र महतो जानकारी देत कहलनि जे कानून विपरीत रूपे आश्रम द्वारा अनधिकृत संरचना निर्माण सहित विभिन्न गतिविधि कएल जा रहल छल। स्थानीय सरकार सञ्चालन ऐन, २०७४ अनुसार नक्सा पास बिना भवन निर्माण करनाय गैरकानूनी अछि आ गैरसरकारी संस्थासभकेँ नगरपालिकासँ अनुमति लऽ कए मात्र गतिविधि करबाक व्यवस्था अछि।

नगरप्रमुख महतो कहलनि, “कानूनी प्रावधानक उल्लंघन भेल अछि एहन व्यापक जनगुनासो प्राप्त भेलाक बाद ई गतिविधि यथाशीघ्र रोकबाक अनुरोध कएल गेल अछि।”

एलानी जमीन कब्जा कए आश्रम बनौने आरोपमे गत पुस २६ गते पूर्वनिर्धारित समय अनुसार नापजाँच करबाक क्रममे स्थानीय बासिन्दा आ आश्रमक अनुयायीसँ झडप भेल छल। झडपमे आधा दर्जनसँ बेसी स्थानीय घायल भेल छलाह। एही घटनाक बाद आक्रोशित स्थानीय जनकपुर–ढल्केवर सडक खण्डमे चक्काजाम कए देलनि। स्थिति नियन्त्रणमे आनबाक लेल प्रहरीले १६ सेल अश्रुग्यास प्रहार कएने छल।

उक्त आश्रममे भारतमे जेल जीवन काटि रहल रामपालक पूजा–आराधना होइत अछि। ओहि कारणे नेपालक विभिन्न ठामसँ आ भारतसँ सेहो अनुयायी एतए आबैत रहल छथि।