२५ करोडसम्मका उद्योग अब जिल्लाबाटै दर्ता हुने, उद्योग विभागले गर्‍यो अधिकार हस्तान्तरण

1 महीना पहिले प्रकाशित

Smrititimes

काठमाडौं ,२४ बैशाख ।। सरकारले साना तथा घरेलु उद्योगसम्बन्धी सेवा प्रवाहलाई सहज बनाउन २५ करोड रुपैयाँसम्म स्थिर पुँजी भएका स्वदेशी उद्योगको दर्ता तथा नियमन अधिकार प्रदेश र जिल्लास्तरमा हस्तान्तरण गर्ने प्रक्रिया अघि बढाएको छ।

उद्योग विभागले जारी गरेको सूचनाअनुसार अब यस्ता उद्योगको दर्ता, नवीकरण तथा अन्य प्रशासनिक काम सम्बन्धित प्रदेश सरकारअन्तर्गतका घरेलु तथा साना उद्योग कार्यालयमार्फत सञ्चालन हुनेछ। यससँगै उद्योगी व्यवसायीले एउटै कामका लागि विभाग र जिल्लास्तरीय कार्यालय दुवैतिर धाउनुपर्ने अवस्था अन्त्य हुने बताइएको छ।

सरकारले गत चैत १३ गते मन्त्रिपरिषद्बाट स्वीकृत ‘शासकीय सुधार सम्बन्धी कार्यसूची’ अन्तर्गत उद्योग दर्तामा रहेको दोहोरो प्रणाली हटाउने निर्णय गरेको थियो। सोही निर्णय कार्यान्वयन गर्दै उद्योग, वाणिज्य तथा आपूर्ति मन्त्रालयले वैशाख १० गते मन्त्रीस्तरीय निर्णयमार्फत फाइल हस्तान्तरण प्रक्रिया सुरु गरेको हो।

हाल उद्योग विभागमा रहेका २५ करोडसम्मका स्वदेशी उद्योगका अभिलेख तथा फाइल सम्बन्धित प्रदेश सरकारको उद्योग हेर्ने मन्त्रालयमा पठाउन थालिएको विभागले जनाएको छ। प्रदेश मन्त्रालयमार्फत ती कागजात सम्बन्धित जिल्लास्थित घरेलु तथा साना उद्योग कार्यालयमा हस्तान्तरण गरिनेछ।

उद्योग विभागकी निर्देशक उर्मिला खडिवडाले संघीय शासन व्यवस्थाअनुसार सेवा विकेन्द्रीकरण गर्दा उद्योगीलाई आफ्नै जिल्ला वा प्रदेशबाट सेवा लिन सहज हुने बताइन्। उनका अनुसार नयाँ व्यवस्थाले समय र खर्च दुवै घटाउने अपेक्षा गरिएको छ।