भारत–नेपाल सीमापर ५० हजारसँ बेसी शंकास्पद भारतीय जाली नोटक संग दू गोटे गिरफ्तार

3 महीना पहिले प्रकाशित

Smrititimes

जनकपुरधाम, साउन १८ । भारत–नेपाल अन्तर्राष्ट्रिय सीमावर्ती क्षेत्रमे भारतीय सुरक्षा निकायसभ ५० हजारसँ बेसी मूल्यक शंकास्पद भारतीय जाली नोटक संग दू गोटे व्यक्तिके गिरफ्तार कएलक अछि । भारतीय सुरक्षा निकायक अनुसार, एफआईसीएन (जाली भारतीय मुद्रा) विरुद्ध चलि रहल विशेष अभियान अन्तर्गत मधुबनी जिलाक दुहबी बजार क्षेत्रमे गोप्य सूचनाक आधारपर ४८म वाहिनी सशस्त्र सीमा बल (एसएसबी), बासोपट्टी थाना प्रहरी, बिहार एसटीएफ आ एसओजीक संयुक्त टोली विशेष खोज अभियान चलौलक । अभियानक दौरान दू गोटे शंकास्पद व्यक्ति भागबाक प्रयास केलनि, मुदा सुरक्षा टोली हुनकासभके घेरि कऽ गिरफ्तार कऽ लेलनि।

स्वतन्त्र साक्षीक उपस्थितिमे कएल गेल तलाशीमे हुनक झोलासँ भारतीय ५० हजार १५० रुपैयाँ बराबरिक शंकास्पद जाली नोट बरामद भेल । बरामद नोटमे ५० रुपैयाँक ८१टा, १०० रुपैयाँक ११०टा, २०० रुपैयाँक ३३टा आ ५०० रुपैयाँक ५७टा नोट शामिल अछि। एहिक अतिरिक्त ओप्पो आ भिभोक दूटा मोबाइल फोन सेहो जप्त कएल गेल अछि । गिरफ्तार भेल व्यक्तिमेसँ एक गोटे बासोपट्टी थाना क्षेत्रक दुहबी बजार वार्ड नम्बर ११ निवासी छथि, जखन कि दोसर बाबूबरही थाना क्षेत्रक भटचौरा वार्ड नम्बर ६ निवासी छथि ।

प्रारम्भिक अनुसन्धानमे ई बात सामने आएल अछि जे जाली नोटसभ सीमावर्ती क्षेत्रमे जमा कऽ जयनगर, बासोपट्टी, मधुबनी आ आसपासक बजारसभमे चलाबए क योजना छल। घटनासँ जुड़ल आन व्यक्ति आ सम्भावित सञ्जालक पहिचान लेल सुरक्षा निकायसभ द्वारा थप अनुसन्धान जारी अछि । बरामद जाली मुद्रा, मोबाइल फोन आ गिरफ्तार दूनू आरोपीके आवश्यक कानूनी प्रक्रिया पूरा कऽ बासोपट्टी थाना प्रहरीके आगाँक अनुसन्धान आ कानूनी कारबाही लेल बुझा देल गेल अछि।