भन्सार छलीका करिब १३ लाख ९५ हजार रुपैयाँ बराबरका सामानसहित पिकअप र चालक नियन्त्रणमा

1 घन्टा पहिले प्रकाशित

Smrititimes

जनकपुरधाम
साउन १७ गते । धनुषाको जनकपुर उपमहानगरपालिका–८ स्थित बजरंग चोक क्षेत्रमा प्रहरीले भन्सार छलीका किराना सामानसहित एक पिकअप र चालकलाई नियन्त्रणमा लिएको छ।

प्रहरीका अनुसार मिति २०८३ साउन १७ गते दिउँसो करिब १ः०० बजे जिरोमाइलबाट महेन्द्रनगरतर्फ जाँदै गरेको प्रदेश–२–०२–००१ च ०४३० नम्बरको पिकअपलाई प्रहरी चौकी जनकपुरधाम, धनुषाबाट प्रहरी सहायक निरीक्षकको कमाण्डमा खटिएको टोलीले चेकजाँच गरेको थियो। चेकजाँचका क्रममा पिकअपमा भन्सार छली गरी ल्याइएका विभिन्न किराना सामान फेला परेपछि पिकअपसहित चालकलाई नियन्त्रणमा लिइएको हो।
नियन्त्रणमा लिइएका चालक धनुषाको क्षिरेश्वरनाथ नगरपालिका–६, महेन्द्रनगर निवासी २१ वर्षीय ललित यादव रहेका छन्।
प्रहरीले नियन्त्रणमा लिएको सामानमा १० बोरा चिनी (अन्दाजी मूल्य रु. ५० हजार), ४ कार्टुन अचार (रु. ४ हजार ८ सय), १५ प्याकेट रजनीगन्धा (रु. ३० हजार) र ३० प्याकेट तुलसी (रु. १० हजार) रहेका छन्। साथै, पिकअपको अन्दाजी मूल्य रु. १३ लाख रहेको प्रहरीले जनाएको छ।
बरामद सामान, पिकअप तथा चालकसहित जम्मा अन्दाजी रु. १३ लाख ९४ हजार ८ सय बराबरको सामग्री आवश्यक कारबाहीका लागि जिल्ला प्रहरी कार्यालय धनुषा पठाइएको प्रहरीले जनाएको छ। घटनाबारे थप अनुसन्धान भइरहेको छ।