बाढीपीडितको राहत तथा पुनःस्थापनाका लागि भायानेटद्वारा रु. २० लाख सहयोग

2 महीना पहिले प्रकाशित

Smrititimes

जनकपुरधाम
भदौँ २३ गते । भाईनेट कम्युनिकेसन्स लिमिटेडले हालै आएको विनाशकारी बाढीबाट प्रभावित परिवार तथा समुदायको राहत, उद्धार र पुनःस्थापनाका लागि रु. २० लाख आर्थिक सहयोग गरेको छ। कम्पनीले प्रधानमन्त्री दैवी प्रकोप उद्धार कोषमा उक्त रकम योगदान गरेको हो । बाढीका कारण विभिन्न क्षेत्रमा ठूलो जनधनको क्षति हुनुका साथै सयौँ परिवार प्रभावित भएका छन्। विपद्का कारण विस्थापित भएका नागरिकलाई तत्काल राहत उपलब्ध गराउन, उद्धार कार्यलाई प्रभावकारी बनाउन तथा प्रभावित क्षेत्रको पुनःस्थापनामा सहयोग पु¥याउने उद्देश्यले भायानेटले उक्त रकम प्रदान गरेको जनाएको छ । कम्पनीका अनुसार विपद्को कठिन परिस्थितिमा प्रभावित परिवार तथा समुदायप्रति ऐक्यबद्धता जनाउँदै मानवीय सहयोगस्वरूप प्रधानमन्त्री दैवी प्रकोप उद्धार कोषमा योगदान गरिएको हो। बाढी तथा डुबानबाट प्रभावित नागरिकलाई तत्काल खाद्यान्न, आवास, स्वास्थ्य उपचारलगायत आधारभूत आवश्यकताका सामग्री उपलब्ध गराउन यस्ता सहयोगले महत्वपूर्ण भूमिका खेल्ने अपेक्षा गरिएको छ । भायानेटले प्राकृतिक विपद्का कारण समस्यामा परेका नागरिकको पीडाप्रति गम्भीर चासो व्यक्त गर्दै राहत, उद्धार र पुनःस्थापनाका लागि आवश्यक सहयोगमा निरन्तर साथ रहने प्रतिबद्धता पनि जनाएको छ। कम्पनीले विपद्को समयमा निजी क्षेत्रले सरकार, स्थानीय तह तथा सम्बन्धित निकायसँग सहकार्य गर्दै प्रभावित नागरिकको जीवन सामान्य बनाउन योगदान गर्नुपर्नेमा जोड दिएको छ । नेपालमा बाढी, पहिरो, डुबान तथा अन्य प्राकृतिक विपद्का घटना दोहोरिँदै आएका छन्। यस्ता विपद्का समयमा सरकारी संयन्त्रसँगै निजी क्षेत्र, सामाजिक संघसंस्था तथा आम नागरिकबाट हुने सहयोगले राहत तथा उद्धार अभियानलाई थप प्रभावकारी बनाउन मद्दत पुग्ने गर्छ। विशेषगरी विपद्पछिको पुनःस्थापना लामो समय लाग्ने भएकाले तत्कालीन राहतसँगै दीर्घकालीन सहयोगको आवश्यकता रहने गर्दछ।
भाईनेटको रु. २० लाखको सहयोगलाई कम्पनीको सामाजिक उत्तरदायित्वअन्तर्गतको महत्वपूर्ण पहलका रूपमा हेरिएको छ । व्यवसायिक गतिविधिसँगै सामाजिक तथा मानवीय क्षेत्रमा योगदान गर्दै आएको निजी क्षेत्रले विपद्का समयमा पनि आफ्नो जिम्मेवारी निर्वाह गर्नुपर्ने सन्देश यस सहयोगले दिएको छ। कम्पनीले विपद्का कारण पीडित बनेका नागरिकलाई आवश्यक राहत तथा सहयोग शीघ्र उपलब्ध होस् भन्ने अपेक्षा राखेको छ। साथै, प्रभावित परिवारको जीवन सामान्य अवस्थामा फर्काउन सरकार तथा सम्बन्धित निकायले अघि बढाइरहेको राहत, उद्धार र पुनःस्थापनाका प्रयासमा आफ्नो सहयोग जारी राख्ने प्रतिबद्धता जनाएको छ ।