तीनू सरकारी बैंकक अध्यक्ष सभ देलनि राजिनामा

1 महीना पहिले प्रकाशित

Smrititimes

काठमाण्डौ, २४ बैशाख । नेपालक तीनू सरकारी बैंकक सञ्चालक समिति अध्यक्ष सभ अपन–अपन पदसँ राजिनामा दऽ देलनि अछि ।
कृषि विकास बैंकक अध्यक्ष डिमप्रसाद पौडेल, राष्ट्रिय वाणिज्य बैंकक अध्यक्ष देवकुमार ढकाल आ नेपाल बैंकक अध्यक्ष प्राध्यापक डा. डिल्लीराज शर्माक राजिनामा देबाक जानकारी भेटल अछि ।
एहि सँ संगहि राष्ट्रिय वाणिज्य बैंकक सम्पूर्ण सञ्चालक समिति सदस्य सभ सेहो पद त्याग कऽ देलनि अछि । बैंकक सञ्चालक सभमे थानप्रसाद पंगेनी, लक्ष्मण घिमिरे, प्राध्यापक डा. रामप्रसाद ज्ञवाली, रोमिला ढकाल उप्रेती, सूर्यबहादुर राना आ हरिकुमार सिलवाल शामिल छथि ।
अर्थ मन्त्रालय स्रोतक अनुसार सरकार तीनू बैंकक अध्यक्ष सभकेँ मन्त्रालयमे बजाकऽ सरकारकेँ सहयोग करबाक लेल इस्तीफा देबाक आग्रह केने छल, जाहिपछि ओ सभ राजीनामा देलनि ।
देवकुमार ढकाल नेपाल राष्ट्र बैंकमे ३० वर्षसँ बेसी समय धरि विभिन्न जिम्मेवारीमे कार्यरत रहल छथि । सरकार हुनका गत साउन २ गते राष्ट्रिय वाणिज्य बैंकक अध्यक्ष नियुक्त केने छल । तहिना, डा. डिल्लीराज शर्मा भादब १८ गते स्वतन्त्र सञ्चालक नियुक्त भेलाक दू दिन बाद नेपाल बैंकक अध्यक्ष बनल छलथि ।
ओहिना, डिमप्रसाद पौडेलकेँ सरकार भादब १९ गते कृषि विकास बैंकक सञ्चालक समिति सदस्य नियुक्त कएने छल आ बादमे अध्यक्षक जिम्मेवारी देल गेल छल ।
सरकार वैशाख १९ गते ‘सार्वजनिक पदाधिकारीक पदमुक्त सम्बन्धी विशेष व्यवस्था अध्यादेश, २०८३’ जारी कऽ अधिकांश राजनीतिक नियुक्ति खारेज कऽ देलक अछि । मुदा नेपाल राष्ट्र बैंक ऐन अध्यादेशमे शामिल नहि भेलाक कारण बैंकिङ क्षेत्रक किछु नियुक्ति सुरक्षित रहल अछि ।

सरकारक एहि निर्णयसँ १०८टा निकायमे रहल १५९४ पदाधिकारीक नियुक्ति रद्द भेल अछि । सरकार राष्ट्र बैंकक गभर्नर डा. विश्वनाथ पौडेलकेँ पद कायम रखने अछि ।