जनकपुरधाममा स्थानीय तहका जनप्रतिनिधि तथा कर्मचारीलाई लैङ्गिक उत्तरदायी बजेट सम्बन्धी तीनदिने तालिम सम्पन्न

2 महीना पहिले प्रकाशित

Smrititimes

जनकपुरधाम
जेठ ५ गते । महिला पुनस्र्थापना केन्द्र (ओरेक) को आयोजना तथा युएन ओमेन को सहयोगमा “सशक्त महिला, समृद्ध नेपाल” कार्यक्रम अन्तर्गत स्थानीय तहमा लैङ्गिक उत्तरदायी बजेट (जीआरबी) तथा लैङ्गिक समावेशी योजना निर्माण सम्बन्धी तीनदिने आवासीय तालिम सम्पन्न भएको छ । वैशाख २९ देखि ३१ गतेसम्म जनकपुरधाम मा आयोजित तालिममा मधेश प्रदेशका पाँच जिल्लाअन्तर्गत छ वटा स्थानीय तहका जनप्रतिनिधि तथा कर्मचारीहरूको सहभागिता रहेको थियो ।

तालिममा वीरगञ्ज महानगरपालिका, पकहामैनपुर गाउँपालिका, गौर नगरपालिका, राजपुर नगरपालिका, यमुनामाई गाउँपालिका तथा जनकपुरधाम उपमहानगरपालिका बाट पालिका प्रमुख, उपप्रमुख, प्रमुख प्रशासकीय अधिकृत तथा विभिन्न शाखाका शाखा प्रमुखहरू गरी जम्मा २८ जनाको सहभागिता रहेको थियो ।

तालिमको सहजीकरण प्रशिक्षक प्रमिता शर्माले गर्नुभएको थियो । तालिममा लैङ्गिकमैत्री योजना, लैङ्गिकमैत्री बजेट, जीआरबी कोडिङ, लैङ्गिक समानता तथा सामाजिक समावेशीकरण (जीईएसआई) नीति, जीईएसआई अडित लगायतका विषयमा केन्द्रित रही व्यवहारिक तथा सहभागितामूलक अभ्यास सञ्चालन गरिएको थियो ।

कार्यक्रमले स्थानीय तहमा लैङ्गिकमैत्री शासन प्रवद्र्धनका लागि भइरहेका पहल, अभ्यास तथा उपलब्धिहरूको समीक्षा गर्दै सुधार आवश्यक रहेका नीतिगत, संरचनागत तथा कार्यान्वयन पक्षहरूको पहिचान गर्न सहयोग पुगेको आयोजकले जनाएको छ । साथै, सहभागीहरूबीच साझा बुझाइ विकास गरी स्थानीय तहमा लैङ्गिक उत्तरदायी योजना तथा बजेट कार्यान्वयनलाई थप प्रभावकारी बनाउने विश्वास व्यक्त गरिएको छ ।