जेठ महिनामा धनुषामा १ सय ५२ अपराध दर्ता, ६९ फरार प्रतिवादी पक्राउ १५ लाख ७५ हजार रुपैयाँ बराबरको रकम फिर्ता

1 घन्टा पहिले प्रकाशित

Smrititimes

जनकपुरधाम
असार २ गते ।
जिल्ला प्रहरी कार्यालय धनुषाले जेठ महिनाभर सम्पादन गरेका गतिविधिको विवरण सार्वजनिक गर्दै अपराध नियन्त्रण, अनुसन्धान तथा समुदाय–प्रहरी साझेदारी कार्यक्रमलाई प्रभावकारी रूपमा अघि बढाएको जनाएको छ । प्रहरीका अनुसार जेठ महिनामा जिल्लाभर कुल १ सय ५२ वटा अपराधका घटना दर्ता भएका छन् । दर्ता भएका घटनामध्ये ज्यान सम्बन्धी ५, आत्महत्या १७, चोरी सम्बन्धी १४, संगठित तथा आर्थिक अपराध २६, सामाजिक अपराध २७, महिला तथा बालबालिकासम्बन्धी १०, सवारीसम्बन्धी ९ तथा अन्य ४४ वटा मुद्दा रहेका छन् । यस अवधिमा ६९ जना फरार प्रतिवादी पक्राउ गरिएको छ । यस्तै, सार्वजनिक चासोका ८९ वटा पेन्डिङ मुद्दामध्ये ५६ वटा फछ्र्योट गरिएको प्रहरीले जनाएको छ । फैसला कार्यान्वयनतर्फ ९८ जना पक्राउ परेका छन् भने उनीहरूबाट ४६ वर्ष ४ महिना कैद सजाय तथा ८ लाख २७ हजार ४ सय २ रुपैयाँ जरिवाना असुल गरिएको छ । महिला, बालबालिका तथा ज्येष्ठ नागरिक सेवा केन्द्रमा जेठ महिनामा ९६ वटा उजुरी दर्ता भएका छन् ।

उजुरीमध्ये अधिकांश १९ देखि ४० वर्ष उमेर समूहका पीडितसँग सम्बन्धित रहेका छन् । घरेलु हिंसासम्बन्धी मात्रै ९६ वटा उजुरी परेकामा ४५ वटा मिलापत्र र ५१ वटा अदालतमा पठाइएको प्रहरीले जनाएको छ । हराएका तथा फेला परेका व्यक्तिको तथ्यांकअनुसार महिला २४ जना, पुरुष ४ जना, बालक २ जना बालिका २९ जना गरी टज्ञ जना हराएकोमा महिला १, पुरुष १ तथा बालिका ५ गरी ७ जना मात्र फेला गरेको जिल्ला प्रहरी कार्यालय धनुषाका सूचना अधिकारी प्रहरी नायव उपरिक्षक मधुसुधन न्यौपानेले जानकारी दिनुभयो ।
लागुऔषध नियन्त्रणतर्फ ११ वटा मुद्दा दर्ता गर्दै प्रहरीले २५ ग्राम गाँजा, ७० दशमलव ३७ ग्राम ब्राउन सुगर तथा विभिन्न प्रकारका हजारौं ट्याब्लेट र औषधिजन्य लागू पदार्थ बरामद गरेको छ । आत्महत्यासम्बन्धी १६ घटना दर्ता भएका छन्। तीमध्ये अधिकांश १६ देखि ४५ वर्ष उमेर समूहका व्यक्तिहरू रहेको तथ्यांकले देखाएको छ ।

प्रहरीका अनुसार जेठ महिनामा कर्तव्य ज्यान, ज्यान मार्ने उद्योग, लागूऔषध, बैंकिङ कसूर तथा साइबर अपराधलगायतका ३३ वटा मुख्य अपराधका घटनाको अनुसन्धान गरिएको थियो । अपराध न्यूनीकरणका लागि प्रहरीले नियमित गस्ती, चेकजाँच, भारतीय सुरक्षा निकायसँग समन्वय तथा जनचेतनामूलक कार्यक्रमलाई निरन्तरता दिएको जनाएको छ । समुदाय केन्द्रित ५६ वटा कार्यक्रम सञ्चालन गरी १ हजार ५ सय ५५ जना लाभान्वित भएका छन ्। लागूऔषध, आत्महत्या, महिला हिंसा, बालविवाह, साइबर अपराध, ट्राफिक सचेतना तथा अन्य विषयमा कार्यक्रम सञ्चालन गरिएको थियो । विद्यालय केन्द्रित कार्यक्रममार्फत पनि विद्यार्थीहरूलाई साइबर अपराध, बालविवाह, लागूऔषध दुव्र्यसन, लैंगिक हिंसा तथा मानव बेचबिखनजस्ता विषयमा सचेतना प्रदान गरिएको प्रहरीको भनाइ छ ।
जेठ महिनामा जिल्लाभर ७ हजार ४ सय ३२ वटा विभिन्न प्रकारका प्रहरी ड्युटी सञ्चालन गरिएको थियो, जसमा २५ हजार ९ सय ८४ जना प्रहरी जनशक्ति परिचालन गरिएको विवरणमा उल्लेख छ । नागरिक सहायता कक्षमार्फत ४ हजार ३ सय ३४ जना सेवाग्राहीलाई सेवा प्रदान गरिएको छ भने नागरिकता लगायतका प्रयोजनका लागि ५ सय ९४ वटा मुचुल्का तयार गरिएको प्रहरीले जनाएको छ ।

प्रहरीले अवैध मदिरा नियन्त्रण, प्राकृतिक स्रोत दोहन नियन्त्रण, वन पैदावार तथा पशुपक्षी चोरी–पैठारी नियन्त्रणमा समेत विभिन्न उपलब्धि हासिल गरेको जनाएको छ । अनुचित लेनदेनसम्बन्धी ९ वटा निवेदन मिलापत्रमार्फत टुंग्याउँदै १५ लाख ७५ हजार रुपैयाँ बराबरको रकम फिर्ता गराइएको समेत प्रहरीले जनाएको छ । जिल्ला प्रहरी कार्यालय धनुषाका प्रवक्ता प्रहरी नायब उपरीक्षक मधुसुधन न्यौपानेका अनुसार अपराध नियन्त्रणसँगै समुदायसँगको सम्बन्ध सुदृढ बनाउन जनचेतनामूलक कार्यक्रमलाई थप प्रभावकारी बनाइनेछ ।