देवडिहामा विद्युत समस्या चर्किंदै, नयाँ ट्रान्सफर्मर जडानको माग

2 घन्टा पहिले प्रकाशित

Smrititimes

जनकपुरधाम
असार ३ गते । धनुषा जिल्लाको नगराइन नगरपालिका वडा नं. ७ देवडिहा गाउँका बासिन्दाहरु ट्रान्सफर्मर जडानको माग गर्दै सम्बन्धित निकायहरुमा बुधबार ज्ञापनपत्र बुझाएका छन् । यस गम्भीर समस्याको समाधानका लागि स्थानीय रामचन्द्र शर्माको अगुवाईमा देवडिहाका जागरुक युवाहरूले नेपाल विद्युत प्राधिकरण जनकपुर, जिल्ला प्रशासन कार्यालय धनुषा, नगराइन नगरपालिकाका प्रमुख प्रशासकीय अधिकृत तथा धनुषा क्षेत्र नं. ३ बाट निर्वाचित प्रतिनिधिसभा सदस्य माननीय मनीष झाको सचिवालयमा निवेदन पत्र पठाएका छन्।
वर्षौंदेखि विद्युत समस्याबाट पीडित हुँदै आएका छन् । गाउँमा करिब तीन वर्षअघि नै विद्युतका पोलहरू गाडिए पनि विभिन्न विवाद तथा अवरोधका कारण हालसम्म तार टाँग्ने र ट्रान्सफर्मर जडान गर्ने कार्य सम्पन्न हुन सकेको छैन।
स्थानीयवासीका अनुसार अहिलेको अत्यधिक गर्मीमा न्यून भोल्टेजको समस्याले जनजीवन निकै कष्टकर बनेको छ । घरमा पङ्खा समेत राम्रोसँग सञ्चालन हुन नसक्ने अवस्था रहेको छ भने सिँचाइका मोटर तथा अन्य विद्युतीय उपकरण प्रयोग गर्दा भोल्टेज झन् घट्ने र बत्तीसमेत बल्न नसक्ने समस्या बारम्बार दोहोरिने गरेको छ । निवेदनमार्फत तीन वर्षदेखि गाडिएका पोलहरूमा तत्काल तार टाँगी नयाँ ट्रान्सफर्मर जडान गरी देवडिहावासीलाई विद्युत समस्याबाट राहत प्रदान गर्न सम्बन्धित निकायसँग माग गरिएको छ । स्थानीयवासीहरूले विद्युत सेवा आजको समयमा केवल सुविधा नभई आधारभूत आवश्यकता भएको उल्लेख गर्दै सम्बन्धित निकायहरूलाई जनताको समस्या बुझेर तत्काल आवश्यक पहल, चासो र निर्णय लिन आग्रह गरेका छन्। “देवडिहामा तत्काल तार टाँगौँ, नयाँ ट्रान्सफर्मर जडान गरौँ र जनतालाई राहत दिलाऔँ।” भन्दै देवडिहावासीले विद्युत पूर्वाधार विस्तार र भोल्टेज समस्याको स्थायी समाधानका लागि सम्बन्धित निकायको शीघ्र ध्यानाकर्षण गराएका छन्।