सिटिजन बैंकद्वारा जानकी वृद्धाश्रमलाई खाद्यान्न तथा आवश्यक सामग्री हस्तान्तरण

1 घन्टा पहिले प्रकाशित

Smrititimes

जनकपुरधाम,
असार १९ गते
सिटिजन बैंक लिमिटेडको जनकपुरधाम शाखाले आफ्नो संस्थागत सामाजिक उत्तरदायित्व (सीएसआर) कार्यक्रमअन्तर्गत जानकी वृद्धाश्रमलाई खाद्यान्न तथा दैनिक उपभोगका आवश्यक सामग्री शुक्रबार हस्तान्तरण गरेको छ । समाजका ज्येष्ठ नागरिकको संरक्षण, सम्मान र सहयोग गर्ने उद्देश्यले आयोजित कार्यक्रममा बैंकले करिब २७ हजार रुपैयाँ बराबरका सामग्री प्रदान गरेको जनाएको छ ।
जनकपुरधाम उपमहानगरपालिका–८ स्थित जानकी वृद्धाश्रममा आयोजित कार्यक्रममा बैंकका प्रतिनिधिहरूले वृद्धाश्रमका पदाधिकारीलाई विभिन्न आवश्यक सामग्री औपचारिक रूपमा हस्तान्तरण गरेका थिए। बैंकका डिपोजिट मार्केटिङ हेड कृष्णकुमार ठाकुरका अनुसार वृद्धाश्रमलाई ८ थान सिलिङ फ्यान, १८ थान सारी, २ कार्टुन फ्रुटी, सोयाबिन, चना, बिस्कुटलगायत खाद्यान्न तथा दैनिक जीवनमा आवश्यक पर्ने सामग्री उपलब्ध गराइएको हो । ती सामग्रीले वृद्धाश्रममा आश्रित ज्येष्ठ नागरिकहरूको दैनिकी सहज बनाउन सहयोग पुग्ने विश्वास बैंकले व्यक्त गरेको छ ।
कार्यक्रममा बोल्दै बैंकका मधेश प्रदेश प्रमुख नितेश खड्कीले संस्थागत सामाजिक उत्तरदायित्वअन्तर्गत बैंकले समाजका विभिन्न क्षेत्रमा आवश्यक सहयोग गर्दै आएको उल्लेख गर्नुभयो । समाजका ज्येष्ठ नागरिक, विपन्न तथा सहयोगको आवश्यकता भएका समुदायलाई साथ दिनु बैंकको सामाजिक दायित्व भएको भन्दै आगामी दिनमा पनि यस्ता कार्यक्रमलाई निरन्तरता दिइने उहाँले बताउनुभयो ।

त्यसैगरी, सो बैँकका जनकपुरधाम शाखा प्रमुख अभय ठाकुरले सामाजिक उत्तरदायित्वका कार्यक्रमले बैंक र समुदायबीचको सम्बन्धलाई अझ सुदृढ बनाउने धारणा व्यक्त गर्नुभयो । समाजका विभिन्न वर्गसँग सहकार्य गर्दै आवश्यकता अनुसार सहयोग उपलब्ध गराउने कार्यलाई बैंकले प्राथमिकतामा राखेको उहाँको भनाइ थियो ।
जानकी वृद्धाश्रमका लेखापाल रमेश मिश्रले बैंकले गरेको सहयोगप्रति आभार व्यक्त गर्दै यस्ता सहयोगले वृद्धाश्रम सञ्चालनमा महत्वपूर्ण टेवा पुग्ने बताउनुभयो । वृद्धाश्रममा आश्रित ज्येष्ठ नागरिकहरूको दैनिक आवश्यकताको व्यवस्थापनमा यस्ता सहयोगले सहजता ल्याउने उहाँले उल्लेख गर्नुभयो। निजी क्षेत्रबाट प्राप्त हुने सामाजिक सहयोगले सेवा विस्तार र व्यवस्थापनमा सकारात्मक योगदान पुग्ने विश्वास पनि उहाँले व्यक्त गर्नुभयो ।
कार्यक्रममा सहभागीहरूले निजी क्षेत्रका बैंक तथा वित्तीय संस्थाले सामाजिक उत्तरदायित्वलाई प्राथमिकता दिँदै शिक्षा, स्वास्थ्य, ज्येष्ठ नागरिक, वातावरण संरक्षण तथा विपन्न समुदायको हितमा यस्ता कार्यक्रम सञ्चालन गर्नुपर्नेमा जोड दिएका थिए । कार्यक्रममा बैंकका कर्मचारी रोशन झा, मेनका सिंहलगायतको उपस्थिति रहेको थियो । सिटिजन बैंकले समय–समयमा देशका विभिन्न स्थानमा सामाजिक उत्तरदायित्वअन्तर्गत स्वास्थ्य, शिक्षा, वातावरण संरक्षण, विपद् राहत तथा सामाजिक सेवासँग सम्बन्धित कार्यक्रम सञ्चालन गर्दै आएको जनाएको छ । जनकपुरधाममा गरिएको यो सहयोग पनि समाजप्रति बैंकको उत्तरदायी भूमिकाको एक उदाहरणका रूपमा हेरिएको छ।