बिजयकुमार साहक नेतृत्वमे श्रीराम युवा किमिटिक नया कार्यसमिति निर्वाचित

3 महीना पहिले प्रकाशित

Smrititimes

बटुकनाथ झा
जनकपुरधाम, असार २८ । जनकपुरधामक श्री राम युवा कमिटीक नव कार्यसमिति गठन लेल भेल चुनावक परिणाम सार्वजनिक भऽ गेल अछि । अध्यक्ष पद पर विजयकुमार साह (दबाई) विजयी घोषित भेल छथि ।
अध्यक्ष पद लेल त्रिकोणीय मुकाबलामे विजयकुमार साह ६९ मत प्राप्त कऽ जीत हासिल केलनि। हुनकर निकटतम प्रतिद्वन्द्वी गणेशप्रसाद साहकेँ ५५ मत भेटल, जखन कि अनिकेतकुमार ठाकुर ५१ मत प्राप्त कऽ तेसर स्थान पर रहलाह ।
वरिष्ठ उपाध्यक्ष पद पर शिव ठाकुर सोनार १८५ मतक संग भारी बहुमतसँ विजयी भेलाह। हुनकर प्रतिस्पर्धी उपिन्दर भण्डारीकेँ ३३ आ अजयकुमार ठाकुरकेँ २१ मत प्राप्त भेल । उपाध्यक्ष पद पर दीपककुमार साह पूर्वहिसँ निर्विरोध निर्वाचित भऽ चुकल छलाह।
महासचिव पद लेल शुभाषचन्द्र साह १०० मत प्राप्त कऽ जीत दर्ज केलनि। हुनकर प्रतिद्वन्द्वी विनोद ठाकुरकेँ ६२ मत आ शम्भुलाल दासकेँ ६८ मत भेटल। सचिव पद पर लोकेश्वर झा ७५ मतक संग विजयी भेलाह, जखन कि आनन्दकुमार मण्डल ७१ मत प्राप्त कऽ मामूली अन्तरसँ पराजित भेलाह ।
कोषाध्यक्ष पदक चुनावमे विनय साह १२२ मत प्राप्त कऽ निर्वाचित भेलाह। हुनकर प्रतिद्वन्द्वी रामनाथ यादवकेँ १०२ मत भेटल । कार्यसमिति सदस्य पद पर अमर ठाकुर, धर्मेन्द्र साह (आलु प्याज), दिलिपकुमार साह, जितेन्द्रकुमार भगत, महावीर साह (गोपाल), संजीपकुमार साह आ सुदीपकुमार भण्डारी निर्वाचित भेलाह ।
चुनाव सम्पन्न भेलाक बाद प्रमुख निर्वाचन अधिकृत निर्मलकुमार चौधरी नवनिर्वाचित पदाधिकारीसभकेँ प्रमाणपत्र प्रदान करैत सभकेँ बधाई देलनि आ सफल कार्यकाल लेल शुभकामना व्यक्त केलनि। नव नेतृत्वसँ संगठनमे नव ऊर्जा आबएबाक अपेक्षा कएल जा रहल अछि। नव अध्यक्ष विजयकुमार साह (दबाई) जनौलनि जे संस्था धार्मिक, सांस्कृतिक तथा सामाजिक गतिविधिसभकेँ आरो व्यवस्थित आ प्रभावकारी बनेबाक दिशा मे काज करत ।
विगत चुनावसभ पर नजरि देल जाए तऽ प्रत्येक कार्यकालमे नेतृत्व परिवर्तन लोकतान्त्रिक प्रक्रियासँ भेल अछि । पूर्व अध्यक्षसभ अपन–अपन कार्यकालमे संस्थाक गतिविधिक विस्तार, आयोजनकेँ व्यवस्थित बनाबय तथा युवासभकेँ जोड़बाक प्रयास करैत रहलाह । हुनकर नेतृत्वमे कमिटी केवल धार्मिक गतिविधिसँ सीमित नहि रहि सामाजिक सेवाक क्षेत्रमे सेहो सक्रियता देखौने छल।श्री राम युवा कमिटीक इतिहास एहि बातक साक्षी रहल अछि जे प्रत्येक अध्यक्ष अपन कार्यकालमे संस्थाकेँ आगाँ बढ़ेबाक प्रयास केने छथि। आब नव नेतृत्व ओहि परम्पराकेँ निरन्तरता दैत संस्थाकेँ विकासक नव आयाम देबाक जिम्मेवारी सम्हारलक अछि । मुदा निर्वाचित व्यक्तिसबके बिच एकौहटा महिला नै देखला सँ युवा किमिटि पुर्ण नै देखलजाइत अछि । कमिटिमे महिलाके सेहो सदस्यता देबाक वातावरण नव नेतृत्व करता से आशा कएलजारहल अछि ।