भन्सार छलीका ११ लाख १६ हजारका कपडा धनुषा प्रहरीको नियन्त्रणमा

2 घन्टा पहिले प्रकाशित

Smrititimes

जनकपुरधाम
असार ३२ । जिल्ला प्रहरी कार्यालय धनुषाले भन्सार छली गरी भित्र्याइएका अनुमानित ११ लाख १६ हजार रुपैयाँ बराबरका कपडा बरामद गरेको छ ।
बिहिबार गोप्य सूचनाका आधारमा जिल्ला प्रहरी कार्यालय धनुषाबाट प्रहरी उपरीक्षक रूपेश खड्काको नेतृत्वमा खटिएको टोलीले जनकपुर उपमहानगरपालिका–७, नमस्कार चोकस्थित लक्ष्मण साहको सटर भएको घरमा खानतलासी गरी सामानहरु बरामद गरेको छ ।
स्थानीय, बुद्धिजीवी, भद्रभलादमी तथा जनप्रतिनिधिको रोहवरमा गरिएको खानतलासीका क्रममा भन्सार छली गरी लुकाइछिपाइ राखिएका अनुमानित मूल्य ८ लाख ७४ हजार रुपैयाँ बराबरको १,७४८ थान बालबालिकाका पाइन्ट तथा अनुमानित मूल्य २ लाख ४२ हजार रुपैयाँ बरामद भेष्ट तथा २४२ थान लेडिज सुट गरिएको प्रहरीले जनाएको छ ।
बरामद गरिएका सामानको कुल अनुमानित मूल्य ११ लाख १६ हजार रुपैयाँ रहेको तथा सामानलाई आवश्यक अनुसन्धान तथा कानुनी प्रक्रिया अघि बढाउन जिल्ला प्रहरी कार्यालय धनुषामा राखिएको प्रहरीले जनाएको छ ।
भन्सार छलीबाट हुने अवैध कारोबारले सरकारको राजस्वमा प्रत्यक्ष असर पार्ने भएकाले यस्ता गतिविधिविरुद्ध निगरानी र कारबाहीलाई निरन्तरता दिइने प्रहरीको भनाइ छ। घटनाबारे थप अनुसन्धान जारी रहेको जनाइएको छ।