धनुषामा कफ्र्यू कार्यान्वयन गर्न नेपाली सेना परिचालन

39 मिनट पहिले प्रकाशित

Smrititimes

जनकपुरधाम
साउन १४ गते ।
धनुषा जिल्लाको सुरक्षा अवस्था थप संवेदनशील बन्दै गएपछि स्थानीय प्रशासनले कफ्र्यू प्रभावकारी रूपमा कार्यान्वयन गर्न नेपाली सेना परिचालन गर्ने निर्णय गरेको छ । जिल्ला प्रशासन कार्यालय धनुषाले बिहीबार अपराह्न ३ः३० बजेदेखि अर्को सूचना जारी नभएसम्म लागू गरिएको कफ्र्यूको पूर्ण पालना गराउन नेपाली सेनाको सहयोग मागेको हो। यसअनुसार विष्णुदल गण, महेन्द्रनगर ब्यारेकलाई आवश्यक सुरक्षा व्यवस्थापनका लागि परिचालन हुन अनुरोध गरिएको छ । प्रमुख जिल्ला अधिकारी प्रेमप्रसाद लुइँटेलद्वारा पठाइएको पत्रमा कफ्र्यू लागू भएका क्षेत्रमा शान्ति–सुरक्षा कायम राख्न नेपाली सेनाको भूमिका आवश्यक भएको उल्लेख गरिएको छ ।
प्रशासनका अनुसार कफ्र्यूको दायरा पूर्वमा बेलौनी रोड–एमक्यू स्टिल क्षेत्र, पश्चिममा सिनुरजोडा, सोहनी, मणिमण्डप, इस्कोन जनकपुर, दुधमती पुल र कादरी मस्जिद क्षेत्रसम्म फैलिएको छ। त्यसैगरी उत्तरमा लक्ष्मीनिया हाटबजार हुँदै लक्ष्मीपुर बगेवासम्म तथा दक्षिणमा नगराइन नगरपालिका र नगराइन चोक आसपासका क्षेत्र कफ्र्यूको सीमाभित्र परेका छन् । स्थानीय प्रशासन ऐन, २०२८ को दफा ६(१)(क)२ अनुसार गरिएको अनुरोधमा शान्ति–सुरक्षा कायम गर्न आवश्यक परे कानुनअनुसार न्यूनतम बल प्रयोग गर्न तथा अन्तिम विकल्पका रूपमा गोली चलाउने अधिकारसमेत नेपाली सेनालाई प्रत्यायोजन गरिएको जनाइएको छ ।
जिल्लामा पछिल्ला दिनहरूमा प्रदर्शन तथा तनाव बढ्दै गएपछि प्रशासनले कफ्र्यू आदेश जारी गरेको थियो। सम्भावित हिंसात्मक गतिविधि नियन्त्रण गर्दै जनधनको सुरक्षा सुनिश्चित गर्न सेना परिचालन गरिएको प्रशासनले जनाएको छ ।