भारत–नेपाल सीमामा १८० लिटर नेपाली मदिरा बरामद, एक भारतीय पक्राउ

49 मिनट पहिले प्रकाशित

Smrititimes

जनकपुरधाम
साउन १४ गते ।
भारत–नेपाल अन्तर्राष्ट्रिय सीमामा अवैध मदिरा तस्करीविरुद्ध सञ्चालन गरिएको विशेष अभियानका क्रममा सशस्त्र सीमा बल (एसएसबी) को ४८औँ वाहिनी, जयनगरअन्तर्गत पिपरौन समवाय मुख्यालयले १८० लिटर नेपाली घरेलु मदिरा बरामद गरेको छ। घटनामा संलग्न एक भारतीय नागरिकलाई पक्राउ गरिएको छ ।

एसएसबीका अनुसार जुलाई २९ को बिहान सीमा स्तम्भ नम्बर २८४÷१९ हुँदै नेपालबाट भारततर्फ ठूलो परिमाणमा घरेलु मदिरा तस्करी हुन लागेको गोप्य सूचना प्राप्त भएपछि समवाय प्रमुखको निर्देशनमा विशेष चेकिङ टोली परिचालन गरिएको थियो।
बिहान करिब ६ः४५ बजे चेकिङका क्रममा केही पुरुष तथा महिलाहरू टाउकोमा बोरा बोकेर नेपालबाट भारततर्फ आउँदै गरेको देखिएपछि सुरक्षाकर्मीले उनीहरूलाई रोक्ने प्रयास गरेका थिए। तर सुरक्षाकर्मीलाई देख्नासाथ उनीहरूले बोरा फालेर नेपालतर्फ भाग्ने प्रयास गरेका थिए। यस क्रममा एक जनालाई घटनास्थलबाटै पक्राउ गरिएको भने अन्य तस्करहरू सीमा क्षेत्रको भौगोलिक अवस्थाको फाइदा उठाउँदै फरार भएका थिए।
घटनास्थलमा छाडिएका पाँचवटा बोराको खानतलासी गर्दा ३००–३०० मिलिलिटरका ६०० बोतल नेपाली घरेलु मदिरा, कुल १८० लिटर, बरामद भएको एसएसबीले जनाएको छ। पक्राउ परेका व्यक्तिको साथबाट एक थान ओप्पो मोबाइल फोन पनि बरामद गरिएको छ । प्रारम्भिक सोधपुछका क्रममा पक्राउ परेका व्यक्तिले नेपालबाट मदिरा भारत पु¥याउने कार्यमा आफ्नो संलग्नता स्वीकार गरेको एसएसबीले जनाएको छ। उनी भारतको बिहार राज्यको मधुबनी जिल्लाअन्तर्गत हरलाखी थाना क्षेत्रका बासिन्दा रहेको बताइएको छ ।
बरामद मदिरा, मोबाइल फोन तथा पक्राउ परेका व्यक्तिलाई आवश्यक कानुनी प्रक्रिया पूरा गरी थप अनुसन्धान र कारबाहीका लागि हरलाखी प्रहरी थानामा बुझाइएको छ । एसएसबीको ४८औँ वाहिनी, जयनगरका कमाण्डेन्टले भारत–नेपाल सीमामा अवैध मदिरा, लागूऔषध तथा अन्य प्रतिबन्धित वस्तुको तस्करी नियन्त्रण गर्नु एसएसबीको प्रमुख प्राथमिकता रहेको उल्लेख गर्दै यस्ता गतिविधिविरुद्ध निरन्तर निगरानी र कडा कारबाही जारी रहने बताएका छन्।