सामुदायिक प्रहरी साझेदारी कार्यक्रमअन्तर्गत खरिहानीमा सर्वदलीय तथा सर्वधर्मीय शान्ति बैठक सम्पन्न

2 घन्टा पहिले प्रकाशित

Smrititimes

जनकपुरधाम
साउन १७ गते । सामुदायिक प्रहरी साझेदारी कार्यक्रमअन्तर्गत सबैला नगरपालिका–१०, खरिहानीमा हिन्दु–मुस्लिम समुदायबीच सामाजिक सद्भाव तथा धार्मिक सहिष्णुता प्रवद्र्धन गर्ने उद्देश्यले सर्वदलीय तथा सर्वधर्मीय शान्ति बैठक सम्पन्न भएको छ ।

जिल्ला प्रहरी कार्यालय धनुषाका प्रवक्ता प्रहरी नायव उपरीक्षक मधुसुधन न्यौपानेको विशेष उपस्थितीमा शनिवार भएको बैठकमा इलाका प्रहरी कार्यालय सबैलाका प्रतिनिधि, स्थानीय भद्रभलाद्मी, बुद्धिजीवी, शिक्षक, युवा तथा विभिन्न जातजाति र धर्मका समाजका अगुवाहरूको उल्लेखनीय सहभागिता रहेको थियो । कार्यक्रममा सहभागीहरूले देशका विभिन्न स्थानमा देखिएका साम्प्रदायिक तनावका घटनाप्रति सचेत रहँदै समाजमा शान्ति, सुरक्षा र आपसी सद्भाव कायम राख्न सबै समुदायको सक्रिय भूमिका आवश्यक रहेको बताएका थिए।

उनीहरूले धार्मिक सहिष्णुता, आपसी भाइचारा तथा सामाजिक एकतालाई थप सुदृढ बनाउन सबै समुदाय एकजुट भएर अघि बढ्नुपर्नेमा जोड दिएका थिए । सहभागीहरूले कुनै पनि अफवाह, भ्रम वा उक्साहटमा नलागी आपसी समझदारी, संवाद र सहकार्यका माध्यमबाट गाउँ तथा समाजमा दिगो शान्ति कायम राख्ने प्रतिबद्धता समेत व्यक्त गरेका थिए । सामुदायिक प्रहरी साझेदारी कार्यक्रमअन्तर्गत आयोजित यस्ता कार्यक्रमले समुदाय र प्रहरीबीचको सम्बन्धलाई अझ सुदृढ बनाउँदै सामाजिक सद्भाव र शान्ति स्थापना गर्न महत्वपूर्ण योगदान पुग्ने विश्वास व्यक्त गरिएको थियो ।