धनुषामे विभिन्न मुद्दाक ८ फरार प्रतिवादी पकरलगेल

1 घन्टा पहिले प्रकाशित

Smrititimes

जनकपुरधाम, साउन १९ — धनुषा जिल्ला पुलिस विभिन्न मुद्दामे अदालतसँ दोषी ठहर भऽ फरार रहल ८ गोटे प्रतिवादीके पक्राउ कएने अछि।

जिल्ला प्रहरी कार्यालय धनुषाक अनुसार, धनुषा जिल्ला अदालतक फैसला कार्यान्वयन अभियान अन्तर्गत कैद आ जरिवानाक सजाय पाबि फरार रहल प्रतिवादीसभके खोजी अभियान चलाकऽ जिल्ला प्रहरी कार्यालय आ मातहतक प्रहरी टोली विभिन्न स्थानसँ पक्राउ कएलक।

पक्राउ कएल गेल सभ प्रतिवादीके आवश्यक कानूनी कारबाही लेल धनुषा जिल्ला अदालतमे उपस्थित कराओल गेल अछि।

पुलिसक अनुसार पक्राउ पड़ल प्रतिवादीसभमे सवारी ज्यान मुद्दाक ३ गोटे, चोरी मुद्दाक २ गोटे, जालसाजी मुद्दाक २ गोटे आ लागूऔषध मुद्दाक १ गोटे शामिल छथि।

अदालतक फैसला अनुसार सवारी ज्यान मुद्दामे दोषी ठहर भेल व्यक्तिसभके १५ दिनसँ १ वर्ष धरि कैद आ रु. २ हजारसँ ५ हजार धरि जरिवाना, चोरी मुद्दामे १ महिना धरि कैद आ रु. १ लाख १३ हजारसँ १ लाख ६० हजार धरि जरिवाना, जालसाजी मुद्दामे जनही रु. १२ हजार ५०० जरिवाना, तथा लागूऔषध मुद्दामे १ वर्ष ६ महिना कैद आ रु. १० हजार जरिवानाक सजाय तोकल गेल छल।

जिल्ला प्रहरी कार्यालय धनुषाक प्रवक्ता तथा सूचना अधिकारी प्रहरी नायव उपरीक्षक मधुसुधन न्यौपाने कहलनि जे अदालतक फैसला कार्यान्वयनके प्रभावकारी बनेबाक उद्देश्यसँ फरार प्रतिवादीसभक खोजी तथा पक्राउ अभियान आगाँओ निरन्तर जारी रहत।