मैथिली साहित्य समाजक १५०औँ मासिक कविगोष्ठी सम्पन्न बैदेही ठाकुरक गायन आ जानकीरमनक तबला वादन सँ साहित्यप्रेमी मन्त्रमुग्ध

49 मिनट पहिले प्रकाशित

Smrititimes

जनकपुरधाम, साउन २४ । मैथिली साहित्य समाज जनकपुरधामक आयोजनामे १५०औँ मासिक कविगोष्ठीक विशेष समारोह शनिदिन जनकपुरधामस्थित नेपाल बार एशोसिएसनक सभाकक्षमे सम्पन्न भेल। मैथिली साहित्य समाजक अध्यक्ष विजय दत्त ‘मणि’क अध्यक्षता तथा पूर्व जनस्वास्थ्य निर्देशक विजय कुमार झाक प्रमुख आतिथ्यमे भेल उक्त समारोहमे कवि, साहित्यकार आ साहित्यप्रेमीलोकनिक उल्लेखनीय सहभागिता रहल।

समारोहमे सहभागी कविलोकनि अपन–अपन रचनाक वाचन कए कार्यक्रमकेँ साहित्यिक आ सृजनात्मक बनौलनि। निरन्तर डेढ सय मासधरि मासिक कविगोष्ठीकेँ निरन्तरता देब मैथिली भाषा–साहित्यक लेल महत्वपूर्ण उपलब्धि मानल गेल।

कार्यक्रमक संयोजक काशीकान्त झा ‘रसिक’क अनुसार, हुनक संयोजकत्वमे मैथिली साहित्य समाजक बैनरमे १५०, रामानन्द युवा क्लबमे ३६ तथा फुटकर रूपमे करीब १०० गरी हालधरि २८६ वटा कविगोष्ठी सम्पन्न भऽ चुकल अछि। साढे १२ वर्षक अवधिमे दर्जनौँ नव कविलाई मञ्च उपलब्ध कराओल गेल आ आगामी दिनमे सेहो साहित्यिक गतिविधिकेँ निरन्तरता देबाक प्रतिबद्धता व्यक्त कएलनि।

समारोहक मुख्य आकर्षण बिहारकुण्डस्थित जुगलजोरी मन्दिरक बैदेही ठाकुरक गायन रहल। हुनक गायनमे जानकीरमन ठाकुरक तबला वादनक प्रस्तुतिले कार्यक्रममे बेग्लहि रंग भरि देलक। दूनू कलाकारक प्रस्तुति सँ सभाकक्षमे उपस्थित साहित्यप्रेमी आ दर्शक मन्त्रमुग्ध भऽ गेलाह। अतिथि तथा वक्तालोकनियो दूनू प्रतिभाक प्रशंसा कएलनि।

विशिष्ट अतिथि अधिवक्ता श्याम कुमार मिश्र बैदेही ठाकुरक प्रतिभाक प्रशंसा करैत आगामी दिनमे अपन हैसियतअनुसार सहयोग करबाक आश्वासन देलनि।

समारोहमे विशिष्ट अतिथि शीतल झा, श्याम कुमार मिश्र, अयोध्यानाथ चौधरी तथा डा. अनिल अग्रवाल अपन मन्तव्य रखलनि। वक्तालोकनि मैथिली भाषा आ साहित्यक विकासमे निरन्तर साहित्यिक गतिविधिक महत्वपर चर्चा कएलनि।

एहि अवसरपर विजय दत्त ‘मणि’, काशीकान्त झा ‘रसिक’, देवीकान्त मिश्र ‘मुसनजी’, शुभचन्द्र झा, प्रमोद कुमार झा, फुलेन्द्रलाल कर्ण, बिन्दु ठाकुर, पूनम झा ‘मैथिली’, मोती झा, किरण झा ‘रश्मि’,विभा पाण्डे, सुजित कुमार झा,बैद्यनाथ पासमान, धीरेन्द्र झा ‘मैथिल’, सुमित कुमार झा, आस्था झा, सृष्टि यादव, प्रणय मिश्र, दीपक भण्डारी, विजय यादवलगायत कविलोकनि अपन कविता वाचन कएलनि।

डेढ सय मासधरि नियमित रूपमे कविगोष्ठीकेँ निरन्तरता देनिहार मैथिली साहित्य समाजक ई आयोजन जनकपुरधामक साहित्यिक गतिविधिमे एकटा महत्वपूर्ण पड़ावक रूपमे देखल गेल अछि । कार्यक्रमके संचालन कवि उदिष्टनारायण झा केने छलथि ।