जनकपुरमा ध्वनि प्रदूषण गर्ने २४ मोटरसाइकल प्रहरी नियन्त्रणमा

1 घन्टा पहिले प्रकाशित

Smrititimes

जनकपुरधाम
असोज २६ गते । चाडपर्वलाई लक्षित गरी सञ्चालन गरिएको सुरक्षा अभियानअन्तर्गत धनुषा प्रहरीले जनकपुरधामका विभिन्न स्थानबाट ध्वनि प्रदूषण गर्ने तथा ट्राफिक नियम उल्लङ्घन गर्ने २४ वटा मोटरसाइकल नियन्त्रणमा लिएको छ।
जिल्ला प्रहरी कार्यालय धनुषाका अनुसार २०८३ साल असोज २५ गते परिचालित प्रहरी टोलीले ठूलो आवाज निकाल्ने, तीव्र गतिमा जिगज्याग शैलीमा मोटरसाइकल चलाउने, मादक पदार्थ सेवन गरी सवारी चलाउने तथा स्वरूप परिवर्तन गरिएका मोटरसाइकल नियन्त्रणमा लिएको हो।
चाडपर्वका बेला हुन सक्ने सवारी दुर्घटना न्यूनीकरण, ध्वनि प्रदूषण नियन्त्रण तथा ट्राफिक व्यवस्थापनलाई प्रभावकारी बनाउने उद्देश्यले अभियान सञ्चालन गरिएको प्रहरीले जनाएको छ। नियन्त्रणमा लिइएका मोटरसाइकलमाथि आवश्यक कानुनी प्रक्रिया अघि बढाइएको जिल्ला प्रहरी कार्यालयले जनाएको छ । प्रहरीका अनुसार तीव्र गति, लापरबाहीपूर्ण सवारी सञ्चालन तथा अनावश्यक रूपमा ठूलो आवाज निकालेर मोटरसाइकल चलाउँदा सर्वसाधारणलाई असहज हुनुका साथै दुर्घटनाको जोखिमसमेत बढ्ने गर्छ। यस्ता गतिविधि नियन्त्रण गर्न प्रहरीले निगरानी र कारबाहीलाई तीव्रता दिएको जनाएको छ । धनुषा प्रहरीले चाडपर्वको समयमा सवारी आवागमनलाई सुरक्षित र व्यवस्थित बनाउन नियमित निगरानी तथा कारबाहीलाई निरन्तरता दिने जनाएको छ। प्रहरीले सवारी चालकलाई मादक पदार्थ सेवन गरी सवारी नचलाउन, निर्धारित गतिमा सवारी चलाउन तथा मोटरसाइकलमा अनधिकृत परिवर्तन गरी ध्वनि प्रदूषण नगर्न आग्रह गरेको छ। साथै, ट्राफिक नियमको पूर्ण पालना गर्न र सुरक्षित यातायात व्यवस्थापनमा सहयोग पु¥याउन प्रहरीले जिल्लावासीलाई अपिल गरेको छ।