मधेशी अपाङ्गता भएका व्यक्तिहरुको दुई दिने तालिम सम्पन्न

6 महीना पहिले प्रकाशित

Smrititimes

जनकपुरधाम
कातिक २५ गते ।
आफ्नो अधिकारको लागि आन्दोलन गर्न तत्पर मधेशी अपाङगता भएका व्यक्तिहरुको आन्दोलन केन्द्रित दुई दिने आइतबार तालिम सम्पन्न भएको छ । ’अपाङ्गता भित्रको विविधताको सम्मान ः मधेशी अपाङ्गता भएका व्यक्तिहरुको पहिचान’ नाराका साथ अधिकार प्राप्तिका निम्ति आन्दोलन निर्माण सम्बन्धमा प्रदेश स्तरीय दुई दिने तालिमबाट अधिकारको लागि आवाज उठाउन संगठन निर्माणमा जोड दिदै तालिम सम्पन्न भएको छ ।

अपाङ्ग समाज जनकपुरको आयोजनामा भएको तालिमको दोस्रो दिन मधेशी आन्दोलनकारी तथा गैसस महासंघका केन्द्रिय सदस्य धिरेन्द्र बहादुर सिँह अधिकारको लागि मधेशी समुदायले गरेको विभिन्न आन्दोलनका अनुभव सहभागीहरुलाई सुनाउनु भएको थियो । उहाँले अपाङ्गता भएका व्यक्तिहरुको आन्दोलनलाई दवाउन राज्य पक्षले सो समुदायको माध्यमले प्रयत्न समेत गरेपनि अधिकारको लागि निरन्तर अगाडी बढ्न आग्रह गर्नुभयो । उहाँले नीति निर्माण हुने ठाउँमा अपाङ्गता भएका व्यक्तिहरु नपुगुन्जेल उनिहरुको पक्षमा सदन बोल्ने कोहि नहुने भएकाले संबिधान संसोधन गरी अपाङ्गता कोटा छ्ट्याउन आन्दोलनको विकप्ल नरहेको बताउनु भयो । सो तालिममा सहभागीहरुलाई दलित अधिकारकर्मी अगुवा तथा संचारकर्मी भोला पासमानले नेपालमा विभिन्न आन्दोलनमा दलित समुदायको योगदानका विषयमा सहभागीहरुलाई जानकारी गराउनु भएको थियो ।

उहाँले आफ्नो अधिकारका लागि निरन्तर रुपमा सक्रिय भई लाग्न अपाङगता भएका व्यक्तिहरुलाई आग्रह गर्नुभएको थियो । आन्दोलनका कारण नै मधेश प्रदेशमा दलित शसक्तिकरण ऐन बनेको र कार्यान्वयनको प्रक्रियामा रहेको बताउदै उहाँले चमार समुदायको सिनो आन्दोलन सफलताको विषयमा जानकारी गराउनु भयो । दुई दिने तालिममा दातृसंस्था डिसेविलिटी राइट फन्ड(डिआरएफ)का नेपाल प्रमुख कृष्ण गहतराजले सहभागीहरुलाई तालिम प्रदान गर्नुभयो ।

अपाङ्गता क्षेत्रमा पहाडे र मधेशी अपाङ्गता भएका व्यक्तिहरु बिच असमानता देखिएकाले यसका विरुद्धमा आन्दोलनको तयारी गर्न वातावरण बनाउन यो तालिम भएको राष्ट्रिय अपाङ्ग महासंघ मधेश प्रदेशका अध्यक्ष किरण पासमानले जानकारी दिनुभयो । संघियता भएकै कारण आफु मधेशी भएर पनि महासंघको प्रदेश अध्यक्ष हुन सफल भएको उहाँले बताउनु भयो । तालिममा आयोजक संस्थाका अध्यक्ष शत्रुघन लाल कर्णले अहिले सम्मको अपाङ्गता अधिकारको आन्दोलनको सफलताको बारेमा जानकारी गराउदै अगामी दिनमा हुने आन्दोलनका लागि तयार रहन अपाङ्गता भएका व्यक्तिहरुलाई आग्रह गर्नुभयो । सो तालिममा मधेश प्रदेशका विभिन्न जिल्लाका अपाङ्गता भएका व्यक्तिहरुको सहभागिता रहेको थियो ।