धनुषा ३(२) सँ प्रदेश प्रतिनिधिमे दीपक कुमार ठाकुरक उम्मेदवारी

51 मिनट पहिले प्रकाशित

Smrititimes

जनकपुरधाम, १५ आसिन । नेपाली कांग्रेसक १५म महाधिवेशन अन्तर्गत धनुषा क्षेत्र नम्बर ३ केर प्रदेशसभा क्षेत्र (२) सँ प्रदेश प्रतिनिधि पद लेल युवा नेता दीपक कुमार ठाकुर उम्मेदवारी दर्ता केने छथि ।
जनकपुरधाम उपमहानगरपालिका–८ केर स्थायी निवासी ठाकुर पछिला किछु समय सँ पार्टीक संगठनात्मक गतिविधिक संगहि शिक्षा आ सामाजिक क्षेत्रमे सक्रिय रहल छथि ।
इन्जिनियरिङ अध्ययन केने ठाकुर जनकपुरधाममे विद्यालय सञ्चालन कऽ शिक्षा क्षेत्रसँ सेहो जुड़ल छथि । ओ नेपाली कांग्रेससँ अपन राजनीतिक यात्रा शुरू केने छथि । पार्टीक गतिविधिक संगहि युवा सहभागिता, शिक्षा, सरसफाइ आ सामाजिक उत्तरदायित्वक विषयमे विभिन्न अभियान सञ्चालन करैत आएल छथि ।
करिब ७–८ वर्ष पहिने ठाकुर ‘अपन वार्ड अपने बनाबी’ अभियान सञ्चालन कऽ सरसफाइ आ घर–घरमे कोडिङ अभियान सेहो चलौने छलाह । तकर बाद सेहो जनकपुरधाममे सरसफाइ आ जनचेतनामूलक कार्यक्रम सञ्चालन करैत आएल छथि ।
कोरोना महामारीक समयमे सेहो ठाकुर सामाजिक गतिविधिमे सक्रिय रहल बताओल गेल अछि । शिक्षा क्षेत्रसँ सम्बन्धित विभिन्न जिम्मेवारीमे रहि ओ शैक्षिक सुधारक विषय उठबैत आएल छथि ।
ठाकुर जनकपुरधाम उपमहानगरपालिकाक शिक्षा समितिक सदस्य सेहो छथि । तहिना, एनप्याब्सन जनकपुरधाम नगर समितिक अध्यक्षक रूपमे निजी विद्यालयसँ सम्बन्धित समस्या, शैक्षिक गुणस्तर, व्यवस्थापन आ विद्यार्थीसभक समग्र विकासक विषयमे आवाज उठबैत आएल छथि ।
प्रदेश प्रतिनिधि पदमे उम्मेदवारी देलाक बाद ठाकुर पार्टी संगठनमे युवा पुस्ताक सहभागिता बढ़ेबाक आवश्यकता पर जोर देने छथि । ओ अपन उम्मेदवारीकेँ शिक्षा सुधार, सरसफाइ आ सामाजिक उत्तरदायित्वक विषयसँ जोडÞि कऽ आगाँ बढ़ेबाक बात कहलनि ।
ठाकुर कहलनि, ‘शिक्षा आ सरसफाइ हमर प्रमुख एजेन्डामे अछि । एहि लेल जतेक सम्भव होयत, हम हरपहर सुधारक पक्षमे रहब।’
ठाकुरक उम्मेदवारीसँ धनुषा–३(२) केर कांग्रेसक आन्तरिक निर्वाचनमे युवा पुस्ताक प्रतिनिधित्व आ सामाजिक अभियानसँ जुड़ल विषयसभ सेहो चर्चामे आएल अछि ।