ढल्केवर ट्रमा सेन्टर सार्ने तयारीको विरोधमा संघर्ष समितिद्वारा आन्दोलन घोषणा

1 घन्टा पहिले प्रकाशित

Smrititimes

जनकपुरधाम साउन २२
धनुषाको ढल्केवर ट्रमा सेन्टरलाई अन्यत्र सार्ने तयारीको विरोध गर्दै ढल्केवर ट्रमा सेन्टर संरक्षण संघर्ष समिति ले ट्रमा सेन्टर यथास्थानमै निर्माण गर्न सरकारसँग माग गरेको छ । समितिले शुक्रबार पत्रकार सम्मेलन गरी आन्दोलनका विभिन्न कार्यक्रमसमेत सार्वजनिक गरेको हो । पत्रकार सम्मेलनमा मिथिला नगरपालिकाका प्रमुख महेन्द्र महतोले ढल्केवरमा ट्रमा सेन्टर स्थापना गर्ने निर्णय नेपाल सरकारको नीति तथा कार्यक्रम तथा बजेटमार्फत अघि बढाइएको दीर्घकालीन प्रक्रिया भएको बताए। उनका अनुसार आर्थिक वर्ष २०७८÷७९ मा ट्रमा सेन्टर निर्माणका लागि २० करोड रुपैयाँ बजेट विनियोजन गरिएको थियो। त्यसपछि जग्गा व्यवस्थापन, प्राविधिक अध्ययन, विस्तृत परियोजना प्रतिवेदन (डीपीआर) तयार गर्ने, माटो परीक्षणलगायतका प्रक्रिया अघि बढाइएको उनले जानकारी दिए ।
प्रारम्भिक चरणमा उपयुक्त जग्गा छनोटमा प्राविधिक समस्या देखिएपछि स्थानीय सरकारले विभिन्न विकल्प प्रस्तुत गरे पनि अन्ततः मिथिला नगरपालिका–७ स्थित गैरी टोलमै ट्रमा सेन्टर निर्माण गर्ने निर्णय कायम रहेको महतोले बताए।
उनका अनुसार सहरी विकास मन्त्रालय, स्वास्थ्य तथा जनसंख्या मन्त्रालय, भूमि व्यवस्था मन्त्रालय, संघीय मामिला तथा सामान्य प्रशासन मन्त्रालयलगायत सम्बन्धित निकायसँग समन्वय गरी विज्ञ टोलीबाट स्थलगत अध्ययन गराइएको थियो। त्यसपछि स्वास्थ्य मन्त्रालयले उक्त स्थानलाई स्वीकृति दिएको उनले बताए।
वन, भू–जलाधार, विपद् व्यवस्थापन, मालपोत र नापी कार्यालयलगायतका निकायबाट आवश्यक प्रक्रिया पूरा गर्दै जग्गा प्राप्तिको काम अघि बढाइएको महतोले जानकारी दिए। केही प्राविधिक तथा प्रशासनिक जटिलताका कारण प्रक्रिया केही समय ढिलाइ भए पनि मन्त्रिपरिषद्बाट जग्गा प्राप्तिको स्वीकृति भइसकेको उनको भनाइ छ । महतोका अनुसार २०८३ जेठ ५ गतेको मन्त्रिपरिषद् बैठकले ट्रमा सेन्टर निर्माणका लागि करिब ४ बिघा ३ धुर तथा प्रशासनिक भवनका लागि १ बिघा ७ कठ्ठा जग्गा स्वीकृत गरिसकेको छ। उक्त जग्गाको उपभोग अधिकारसमेत प्राप्त भइसकेको अवस्थामा ट्रमा सेन्टरलाई लहान सार्ने चर्चा आउनु दुःखद भएको उनले बताए ।
सरकारले करोडौं रुपैयाँ खर्च गरेर प्रक्रिया अघि बढाइसकेको आयोजना बीचमै रोक्न खोजिएको आरोप लगाउँदै महतोले मधेश प्रदेशस्तरीय ट्रमा सेन्टर ढल्केवरमै निर्माण हुनुपर्ने माग गरे। उनले ट्रमा सेन्टर संरक्षणका लागि सबै राजनीतिक दल, नागरिक समाज, उद्योगी–व्यवसायी, युवा तथा सञ्चारकर्मीलाई एकजुट भएर आन्दोलनमा सहभागी हुन आग्रह गरे । संघर्ष समितिले यसअघि जिल्ला प्रशासन कार्यालयमार्फत सरकारलाई ज्ञापनपत्र बुझाइसकेको जनाएको छ । समितिले सार्वजनिक गरेको आन्दोलन कार्यक्रमअनुसार साउन २३ गते ढल्केबर पार्कमा नर जुलुस सहित परिक्रमा गरी सभा गर्ने,साउन २४ गते साँझ मसाल जुलुस गर्ने भएको छ ।यस्तै, साउन २५ गते बिहान ११ बजेदेखि ११ः३० बजेसम्म, साउन २६ गते बिहान ११ बजेदेखि १२ बजेसम्म तथा साउन २७ गते बिहान ११ बजेदेखि १ बजेसम्म महेन्द्र राजमार्ग अवरोध गरिने कार्यक्रम रहेको छ। साउन २८ गते बिहान ८ बजे मुंगालाल मोहन महतो स्मृति भवनमा संघर्ष समितिको बैठक बसी थप आन्दोलनका कार्यक्रम घोषणा गरिने समितिले जनाएको छ।