राष्ट्रिय बाल अधिकार दिवसको अवसरमा नगराइनमा हाजिरीजवाफ प्रतियोगिता सम्पन्न

1 महीना पहिले प्रकाशित

Smrititimes

जनकपुरधाम
भदौ २४ गते । राष्ट्रिय बाल अधिकार दिवसको अवसरमा माँ जानकी बाल सञ्जाल, नगराइन नगरपालिका द्वारा आयोजित हाजिरीजवाफ प्रतियोगिता सम्पन्न भएको छ । बालबालिकामा ज्ञान, क्षमता, आत्मविश्वास तथा नेतृत्व क्षमताको विकास गर्ने उद्देश्यले आयोजित प्रतियोगितामा नगराइन नगरपालिका क्षेत्रका विभिन्न विद्यालयका विद्यार्थीहरूले उत्साहपूर्वक सहभागिता जनाएका थिए। प्रतियोगितामा बाल अधिकार, शिक्षा, स्वास्थ्य, समाज तथा समसामयिक विषयसँग सम्बन्धित प्रश्नहरू सोधिएको थियो । कार्यक्रममा नगराइन नगरपालिकाका मेयर विनयकुमार यादव प्रमुख अतिथिका रूपमा उपस्थित थिए भने वडा सदस्य प्रदीपकुमार चौधरी विशिष्ट अतिथिका रूपमा सहभागी भएका थिए। कार्यक्रमको संयोजकत्व माँ जानकी बाल सञ्जालका सचिव आदित्य मण्डलले गरेका थिए।
प्रतियोगितामा राजेश्वर निधि माध्यमिक विद्यालय, नाराइनले प्रथम स्थान हासिल गर्दै प्रथम पुरस्कार प्राप्त गरेको छ। त्यस्तै गिरिजा माध्यमिक विद्यालय दोस्रो र क्याम्ब्रिज सेकेन्डरी स्कुल तेस्रो भएका छन्। कार्यक्रमका वक्ताहरूले बालबालिकालाई आफ्ना अधिकारप्रति सचेत हुन, अधिकारको संरक्षण गर्न तथा समाजको सकारात्मक निर्माणमा सक्रिय भूमिका निर्वाह गर्न आग्रह गरेका थिए। बालबालिकाको अधिकार सुनिश्चित गर्न परिवार, विद्यालय, स्थानीय सरकार तथा समुदायबीच सहकार्य आवश्यक रहेको उनीहरूको भनाइ थियो। वक्ताहरूले यस्ता ज्ञानवर्धक तथा सिर्जनात्मक कार्यक्रमले बालबालिकाको प्रतिभा प्रस्फुटन गर्न महत्वपूर्ण भूमिका खेल्ने बताएका थिए। “आजका सचेत बालबालिका नै भोलिका जिम्मेवार नागरिक हुन्। बाल अधिकारको सम्मान र संरक्षण हामी सबैको साझा जिम्मेवारी हो,” भन्ने सन्देशसमेत कार्यक्रममा दिइएको थियो।