निलार्जुन इन्जिनियरिङ कलेजले भन्यो– ‘गुठीको जग्गा कब्जा गरेको आरोप तथ्यहीन’

2 महीना पहिले प्रकाशित

Smrititimes

जनकपुरधाम

भदौँ ३१ गते । निलार्जुन इन्जिनियरिङ कलेजले आफूले गुठी वा सरकारी जग्गा अवैध रूपमा कब्जा गरेको भन्ने आरोप तथ्यहीन र भ्रामक रहेको दाबी गरेको छ।
कलेज प्रशासनले जारी गरेको विज्ञप्तिमा नेपाल सरकार, शिक्षा मन्त्रालयको पहल तथा मन्त्रिपरिषद्को निर्णयअनुसार सम्बन्धित गो.प्र. विद्यालयबाट विधिवत् रूपमा लिजमा प्राप्त करिब १० बिघा जग्गामा कलेज सञ्चालन हुँदै आएको उल्लेख छ।
कलेजका अनुसार उक्त जग्गामा विगत २५ वर्षदेखि करोडौँ रुपैयाँ खर्च गरेर भौतिक संरचना निर्माण गरी शैक्षिक गतिविधि सञ्चालन हुँदै आएको छ। हाल पनि कलेज परिसरमा नियमित पठनपाठन भइरहेको तथा होस्टेलमा विद्यार्थीहरू बसोबास गरी अध्ययन गरिरहेको विज्ञप्तिमा जनाइएको छ।
कलेजले जग्गा ‘गुठीको जग्गा अवैध रूपमा कब्जा गरिएको’ वा ‘प्रयोगविहीन रहेको’ भन्ने ढंगले सार्वजनिक भएका समाचार तथा सामाजिक सञ्जालका सामग्रीले वास्तविक अवस्था नदेखाउने दाबी गरेको छ।
सर्वोच्चमा परेको रिट खारेज भइसकेको दाबी
कलेज प्रशासनले यही विषयलाई लिएर आफूलाई ‘अभियन्ता’ बताउने एक समूहले सर्वोच्च अदालतमा रिट निवेदन दायर गरेको र उक्त मुद्दा करिब पाँच वर्षसम्म न्यायिक प्रक्रियामा रहेको जनाएको छ।
कलेजका अनुसार सर्वोच्च अदालतले करिब पाँच महिनाअघि उक्त रिट खारेज गरिसकेको छ। सो फैसलाको प्रमाणित प्रति तथा जग्गा प्राप्ति, लिज र सरकारी निर्णयसँग सम्बन्धित आवश्यक कानुनी कागजात कलेजसँग सुरक्षित रहेको विज्ञप्तिमा उल्लेख छ।
कलेजले आवश्यक परे सम्बन्धित सरकारी निकाय तथा सरोकारवालासमक्ष ती कागजात प्रस्तुत गर्न आफू तयार रहेको जनाएको छ।
‘कागजातका आधारमा समाचार सम्प्रेषण गर्न आग्रह’
कलेजले सञ्चारमाध्यमले सार्वजनिक सरोकारका विषयमा प्रश्न उठाउन पाउने अधिकारको सम्मान गर्ने जनाएको छ। तर कुनै संस्थाको प्रतिष्ठा, विद्यार्थीको भविष्य तथा शैक्षिक गतिविधिमा प्रत्यक्ष प्रभाव पार्ने विषयमा समाचार प्रकाशन गर्दा सम्बन्धित पक्षको धारणा, आधिकारिक कागजात र प्रमाणको अध्ययन गर्न आग्रह गरेको छ।
अनुमान, हल्ला वा अपुष्ट स्रोतका आधारमा एकपक्षीय समाचार सम्प्रेषण गर्दा विद्यार्थी, अभिभावक, शिक्षक, कर्मचारी तथा संस्थाको प्रतिष्ठामा असर पर्न सक्ने कलेजको भनाइ छ।
कलेजले विद्यार्थी तथा अभिभावकलाई सामाजिक सञ्जाल, ब्लग वा अन्य माध्यममा प्रकाशित अपुष्ट सामग्रीका आधारमा भ्रमित नहुन आग्रह गर्दै आवश्यक जानकारीका लागि कलेज प्रशासनबाट आधिकारिक सूचना लिन अनुरोध गरेको छ।
यसैगरी, तथ्यहीन तथा प्रमाणविहीन आरोपमार्फत संस्थाको प्रतिष्ठामा आँच पुर्‍याउने कार्य निरन्तर भए उपलब्ध कानुनी उपचार तथा सम्बन्धित निकायमार्फत आवश्यक प्रक्रिया अघि बढाउने अधिकार सुरक्षित रहेको कलेजले जनाएको छ।
कलेज प्रशासनले अन्ततः सञ्चारकर्मी, नागरिक समाज, विद्यार्थी, अभिभावक तथा अन्य सरोकारवालालाई ‘हल्ला होइन, प्रमाण र तथ्यका आधारमा धारणा बनाउन’ आग्रह गरेको छ।
निलार्जुन इन्जिनियरिङ कलेज प्रशासनका आधिकारिक प्रवक्ता सुनिल कुमार झाले जारी गरेको विज्ञप्तिमा उक्त धारणा सार्वजनिक गरिएको हो।