विद्यालय नियमन र स्थानीय पाठ्यपुस्तक कार्यान्वयनलाई प्राथमिकता दिन माग

52 मिनट पहिले प्रकाशित

Smrititimes

जनकपुरधाम, २४ भदौ । जनकपुरधाम उपमहानगरपालिकामा विद्यालय नियमन, कक्षा थपको अनुमति, संस्थागत विद्यालयको वर्गीकरण तथा स्थानीय पाठ्यपुस्तक कार्यान्वयनलगायतका विषयमा निजी तथा संस्थागत विद्यालयका छाता संगठनहरूले ध्यानाकर्षण गराएका छन्।
प्रमुख प्रशासकीय अधिकृत ज्ञानहरि घिमिरे मार्फत नगरपालिकालाई बुझाइएको ध्यानाकर्षण पत्रमा अनुमति प्राप्त गरी अघिल्लो कक्षा सञ्चालनका लागि निवेदन दिएका विद्यालयलाई चैत्र मसान्तभित्र अनुमति प्रदान गरी त्यसको विवरण सार्वजनिक गर्न माग गरिएको छ।
त्यस्तै, स्थानीय विषय लागू भए पनि हालसम्म पाठ्यपुस्तक उपलब्ध हुन नसकेको भन्दै तत्काल पुस्तक छपाइ गरी विद्यालयमा उपलब्ध गराउन आग्रह गरिएको छ। संस्थागत विद्यालयको शुल्क निर्धारण भए पनि त्यसको प्रभावकारी कार्यान्वयन हुन नसकेको भन्दै शुल्कसम्बन्धी निर्णय कार्यान्वयन गर्न पनि माग गरिएको छ।
ध्यानाकर्षण पत्रमा संस्थागत विद्यालयहरूको अनुगमन गरी वर्गीकरण गर्ने प्रक्रिया तत्काल अघि बढाउनसमेत आग्रह गरिएको छ। अनुमति प्राप्त विद्यालयमध्ये केहीले स्वीकृत कक्षाभन्दा माथिका कक्षा सञ्चालन गरिरहेको अनुगमनका क्रममा देखिए पनि हालसम्म कारबाही नभएको भन्दै त्यस्ता विद्यालयमाथि आवश्यक कानुनी प्रक्रिया अघि बढाउन संगठनहरूले माग गरेका छन्।
त्यसैगरी, बिना दर्ता तथा अनुमति सञ्चालनमा रहेका विद्यालयलाई तत्काल नियमन वा कानुनी प्रक्रियाअनुसार बन्द गर्नुपर्ने माग गरिएको छ। अनुमति प्राप्त गरे पनि सञ्चालनमा नरहेका विद्यालयको यकिन गरी आवश्यक प्रक्रिया पूरा गरेर अनुमति खारेज गर्नसमेत ध्यानाकर्षण गराइएको छ।

विद्यालय नियमनसँगै नगरपालिकाले विद्यालय क्षेत्र आसपास लागूऔषध, सुर्तीजन्य तथा मदिराजन्य पदार्थको बिक्री–वितरण नियन्त्रणलाई पनि प्राथमिकतामा राख्ने जनाएको छ। विद्यालय क्षेत्रको करिब २०० मिटर वरिपरि यस्ता पदार्थको बिक्री–वितरण गर्न नपाइने तथा विद्यालय पोशाकमा रहेका विद्यार्थीलाई त्यस्ता पदार्थ बिक्री गर्न प्रतिबन्धित कानुनी व्यवस्थालाई प्रभावकारी रूपमा कार्यान्वयन गर्ने नगरपालिकाको भनाइ छ।
नगरपालिकाले सम्बन्धित सरोकारवालासँग छलफल गरी विद्यालय क्षेत्रलाई लागूऔषध, सुर्तीजन्य तथा मदिराजन्य पदार्थको बिक्री–वितरणबाट मुक्त बनाउने अभियान अघि बढाउने जनाएको छ।
स्थानीय पाठ्यक्रमअन्तर्गतको पाठ्यपुस्तक निर्माण तथा छपाइलाई समेत नगरपालिकाले प्राथमिकतामा राखेको जनाएको छ। स्थानीय पाठ्यक्रम कार्यान्वयनको पहिलो वर्ष भएकाले पाठ्यपुस्तक निर्माण तथा प्रयोगमा केही समस्या देखिएको स्वीकार गर्दै नगरपालिकाले तत्काल समाधान गर्ने प्रतिबद्धता जनाएको हो।
नगरपालिकाका अनुसार स्थानीय पाठ्यक्रमअन्तर्गत पाठ्यपुस्तकको सामग्री तयार भइसकेको छ। अब सार्वजनिक सूचना जारी गरी उपयुक्त छापाखाना छनोट गरेर पाठ्यपुस्तक छपाइको प्रक्रिया अघि बढाइनेछ।
निजी तथा संस्थागत विद्यालयका संगठनहरूले जनकपुरधामलाई शैक्षिक हबका रूपमा विकास गर्न विद्यालय नियमन र शैक्षिक व्यवस्थापनका विषयमा देखिएका समस्याको तत्काल समाधान आवश्यक रहेको बताएका छन्।