परराष्ट्र नीतिलाई स्थिर बनाउन लागिरहेका छौँ : मन्त्री साउँद

3 वर्ष पहिले प्रकाशित

Smrititimes

डडेल्धुरा । परराष्ट्रमन्त्री एनपी साउँदले सरकारले तरल रहेको परराष्ट्र नीतिलाई स्थिरता दिने प्रयत्न गरिरहेको बताउनुभएको छ । नेपाल प्रेस युनियन डडेल्धुरा शाखाले आज जिल्ला सदरमुकाममा आयोजना गरेको पत्रकार सम्मेलनमा अन्तर्राष्ट्रिय सम्बन्धलाई स्थिरता दिने प्रयास भइरहेको बताउनुभयो । “अलिकति तरल रहेको परराष्ट्र नीति तथा अन्तर्राष्ट्रिय सम्बन्धलाई हामीले अहिले स्थिरता दिने प्रयत्न गरिरहेका छौँ । हाम्रो परराष्ट्र नीतिको सम्बन्धमा हामीले संयुक्त राष्ट्रसङ्घको बडापत्रमा उल्लेखित मूल्य र मान्यताहरूलाई सम्मान गर्छौँ”, मन्त्री साउँले भन्नुभयो । कालापानी, लिपुलेक, लिम्पियाधुरा लगायतका भारतसँग सीमा जोडिएका क्षेत्रका बारेमा पनि सरकार गम्भीर रहेको उहाँको भनाई छ । प्रधानमन्त्रीको भारत भ्रमणका क्रममा पनि यी विषयमा कुराकानी भएको र भारत पनि सीमा समस्या समाधानमा सकारात्मक रहेको उहाँले बताउनुभयो ।

“कालापानीलगायत देशभरका अन्य सीमाका बारेमा भारतीय पक्षले दिनुपर्ने रेस्पोन्स हामीले कूटनीतिक रूपमा प्राप्त गर्नुपर्थ्यो त्यो विगतमा गर्न सकिएको थिएन”, उहाँले भन्नुभयो, “भारतीय प्रधानमन्त्रीले सीमासँग सम्बन्धित समस्या वा विवादहरू वार्तामार्फत समाधान गर्नुपर्छ भनेर बोल्नुभएको छ । त्यस्तै सीमा सम्बन्धी समस्याले निकास पाउँछ ।”फरक प्रसङ्गमा परराष्ट्रमन्त्री साउदले अहिलेको सत्ता गठबन्धन नभत्किने समेत प्रष्ट पार्नुभयो । बाहिर हल्लाअनुसार एमालेसँग मिल्ने कुनै सम्भावना नरहेको उहाँले बताउनुभयो । “नेपाली काँग्रेसलाई पुस १० गतेको घटना हेक्का रहेकै छ । हामीले इतिहासबाट पाठ सिक्नुपर्छ त्यसकारण अहिले एमालेसँग नेपाली काँग्रेसको संयुक्त सरकार बन्ने कुनै पनि सम्भावना छैन”, उहाँले भन्नुभयो । साभार : रेडियो नेपाल