जनकपुरधाममा चैत्र ९ गते देखि राजर्षि जनक टि–२० अन्तर कलेज क्रिकेट प्रतियोगिता हुने

2 वर्ष पहिले प्रकाशित

Smrititimes

जनकपुरधाम चैत ६ गते ।
जनकपुरधाममा चैत ९ गते देखि १३ गते सम्म अन्तर कलेज राजर्षिजनक टि २० क्रिकेट प्रतियोगिता हुने भएको छ । राजर्षि जनक क्याम्पसको आयोजना, धनुषा जिल्ला क्रिकेट संघको संयोजन तथा जनकपुर पेस फाउन्डेसनको सहयोगमा हुने सो प्रतियोगिताको बारेमा बुधबार जनकपुरधाम स्थित रामजानकी बहुउद्देश्यीय अन्तराष्ट्रिय रंगशालामा भएको पत्रकार सम्मेलनमा सो जानकारी गराइएको छ । सो पत्रकार सम्मेलनमा बोल्दै आयोजक क्याम्पसका संस्थापक सदस्य तथा हिसान धनुषाका अध्यक्ष संजिव ठाकुरले इन्टर स्कुल क्रिकेट टुर्नामेन्टमा विद्यार्थीहरुको आकर्षण तथा जनकपुर बोल्ट्सको जित पछिको अवसथामा जनकपुरधाममा कलेज स्तरमा समेत प्रतियोगिता गर्ने सोच पलाएको बताउदै अर्को वर्ष देखि साप्ताहिक रुपमा खेल सप्ताह नै संचालन गर्ने बताउनु भयो ।
सो पत्रकार सम्मेलनमा बोल्दै धनुषा जिल्ला क्रिकेट संघका सचिव तथा एन प्याब्सनका धनुषा अध्यक्ष आशिष झाले अगामी दिनमा महिला क्रिकेट टिमहरुको सहभागितामा समेत म्याच हुने बताउनु भयो । उहाँले लिग फर्मेटमा ६ वटा टिमको सहभागितामा सो प्रतियोगिता हुने बताउनु भयो ।
सो प्रतियोगितामा जनकपुरधामको राजर्षि जनक, गोगल प्रसाद उच्चा मावि, राराव क्याम्पस, जनकपुर कम्युनिटी कलेज, मिट क्याम्पस तथा मोनाष्टिक कलेजका विद्यार्थीहरू सहभागी हुने सचिव झाले जानकारी दिनुभयो ।
१३ गतेसम्म चल्ने प्रतियोगितामा कक्षा ११ देखि स्नातकोत्तरसम्मका विद्यार्थीहरू भाग लिएर खेल्न पाउने छन् । करिब ९ लाख खर्च हुने प्रतियोगितामा विजयी हुने टिमलाई मेडल, शिल्ड तथा प्रमाणपत्र प्रदान गरिने भएको आयोजकले जनाएको छ ।