बजेटको आकार घटाउँदै मधेसमा ४१ अर्ब १३ करोड ८६ लाख रुपैयाँको बजेट सार्वजनिक

3 महीना पहिले प्रकाशित

Smrititimes

जनकपुरधाम,
असार १ । मधेस प्रदेश सरकारले आगामी आर्थिक वर्ष २०८३÷०८४ का लागि ४१ अर्ब १३ करोड ८६ लाख रुपैयाँको बजेट सार्वजनिक गरेको छ । नयाँ बजेट चालु आर्थिक वर्षको तुलनामा करिब ५ अर्ब ८४ करोड रुपैयाँले कम रहेको छ ।
प्रदेश सभाको सोमबारको बैठकमा अर्थमन्त्री युवराज भट्टराई ले बजेट प्रस्तुत गर्दै प्रदेशको विकासलाई उत्पादनमुखी र पूर्वाधार केन्द्रित बनाउने लक्ष्य लिइएको बताए । आगामी वर्षका लागि विनियोजित बजेटमध्ये १४ अर्ब ६६ करोड ३२ लाख २९ हजार रुपैयाँ चालु खर्चतर्फ र २६ अर्ब ४७ करोड ५३ लाख ७१ हजार रुपैयाँ पुँजीगत खर्चतर्फ छुट्याइएको छ। कुल बजेटमा पुँजीगत खर्चको हिस्सा ६४.३६ प्रतिशत रहेको छ भने चालु खर्च ३५.६४ प्रतिशत रहेको छ ।
स्रोत व्यवस्थापनतर्फ प्रदेश सरकारले आन्तरिक राजस्व तथा अन्य शीर्षकबाट ११ अर्ब २२ करोड ७५ लाख रुपैयाँ संकलन हुने अनुमान गरेको छ। त्यस्तै संघीय राजस्व बाँडफाँडबाट १२ अर्ब ८३ करोड रुपैयाँ, संघीय सरकारको वित्तीय अनुदानबाट ९ अर्ब ४९ करोड ५९ लाख रुपैयाँ तथा चालु आर्थिक वर्षको बचत रकमबाट ६ अर्ब ८ करोड ५ लाख रुपैयाँ प्राप्त हुने अपेक्षा गरिएको छ ।
प्रदेश सरकारले आगामी वर्षको बजेटमार्फत पूर्वाधार निर्माण, कृषि उत्पादन वृद्धि, शिक्षा र स्वास्थ्य सेवाको विस्तार तथा रोजगारी सिर्जनालाई मुख्य प्राथमिकतामा राखेको जनाएको छ। बजेट प्रस्तुत भएसँगै अब यसमाथि प्रदेश सभामा विस्तृत छलफल हुने प्रक्रिया अघि बढ्नेछ ।
चालु आर्थिक वर्ष २०८२÷०८३ मा मधेस प्रदेशले ४६ अर्ब ९८ करोड ३३ लाख ५१ हजार रुपैयाँको बजेट ल्याएको थियो। नयाँ बजेटको आकार घटे पनि विकास निर्माण तथा उत्पादनशील क्षेत्रका कार्यक्रमलाई प्राथमिकतामा राखिएको प्रदेश सरकारको दाबी छ ।