धनुषाका युवा क्लबहरूको माग : नेपाललाई पुनः हिन्दु राष्ट्र घोषणा गर्न सरकारसँग आग्रह

2 महीना पहिले प्रकाशित

Smrititimes

जनकपुरधाम, साउन १६ — धनुषामा आन्दोलनरत पक्ष र सरकारबीच वार्ता चलिरहेका बेला जिल्लाका केही युवा क्लब तथा सामाजिक संस्थाहरूले नेपाललाई पुनः हिन्दु राष्ट्र घोषणा गर्न सरकारसँग जोडदार माग गरेका छन्।

जनकपुरधाम–४ स्थित श्रीराम युवा कमिटी र जनकपुरधाम–८ स्थित दशरथ युवा कमिटीले शनिबार छुट्टाछुट्टै प्रेस विज्ञप्ति जारी गर्दै हाल कोशी प्रदेशको सुनसरी र मधेश प्रदेशको सिरहासहित तराई–मधेशका विभिन्न जिल्लामा भएका हिंसात्मक तथा संवेदनशील घटनाप्रति गम्भीर चिन्ता व्यक्त गरेका हुन्।

श्रीराम युवा कमिटीले सुनसरीको देवानगञ्ज गाउँपालिका–३, कप्तानगञ्ज तथा सिरहाको गोलबजारलगायत क्षेत्रमा भएका घटनामा ज्यान गुमाएका सुनसरीका ओमप्रकाश मेहता, जयप्रकाश मेहता तथा सिरहाका गणेश यादवप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ। साथै, घाइते भएका नागरिक तथा सुरक्षाकर्मीहरूको शीघ्र स्वास्थ्य लाभको कामना गरेको छ।

कमिटीले घटनाका दोषीलाई कानुनी कारबाही गर्न, पीडितलाई न्याय दिलाउन तथा भविष्यमा यस्ता घटना दोहोरिन नदिन नेपाल सरकार र स्थानीय प्रशासनलाई ठोस कदम चाल्न आग्रह गरेको छ। साथै उद्योग, व्यवसाय तथा सार्वजनिक एवं निजी सम्पत्तिको संरक्षण गर्दै सामाजिक, धार्मिक र साम्प्रदायिक सद्भाव कायम राख्न सबै पक्षसँग अपिल गरेको छ।

श्रीराम युवा कमिटीका अध्यक्ष सरोज कुमार साहद्वारा हस्ताक्षरित विज्ञप्तिमा नेपाललाई पुनः हिन्दु राष्ट्र घोषणा गर्न सरकारसँग जोडदार माग गरिएको छ। साथै संवाद र सहकार्यमार्फत शान्तिपूर्ण समाधान खोज्न सबै सरोकारवाला पक्षलाई आग्रह गरिएको छ।

यस्तै, दशरथ युवा कमिटीले पनि जारी गरेको विज्ञप्तिमार्फत सम्पूर्ण ज्ञात–अज्ञात सहिदप्रति श्रद्धाञ्जली व्यक्त गर्दै उनीहरूको बलिदानको सम्मान गर्नुपर्ने उल्लेख गरेको छ।

कमिटीले नेपालको ऐतिहासिक पहिचान, संस्कृति र परम्पराको संरक्षणका लागि नेपाललाई पुनः हिन्दु राष्ट्र घोषणा गर्नुपर्ने माग राखेको छ। बहुसंख्यक नेपालीको आस्था र भावनाको सम्मान गर्दै सनातन धर्म तथा संस्कृतिको संरक्षणका लागि हिन्दु राष्ट्रको अवधारणा पुनःस्थापित गर्नुपर्ने धारणा विज्ञप्तिमा उल्लेख गरिएको छ।

साथै, नेपाल बहुजातीय, बहुभाषिक तथा बहुधार्मिक मुलुक भएकाले सबै समुदायबीच आपसी सद्भाव, भाइचारा र धार्मिक सहिष्णुता कायम राख्न पनि दशरथ युवा कमिटीले सबै नागरिकसँग अपिल गरेको छ।

दशरथ युवा कमिटीका अध्यक्ष लव कुमार झाद्वारा हस्ताक्षरित विज्ञप्तिमा नेपाल सरकार, राजनीतिक दल, नागरिक समाज तथा सम्बन्धित निकायलाई राष्ट्रिय एकता, सहिदको सम्मान र सामाजिक सद्भावलाई प्राथमिकतामा राख्दै आवश्यक कदम चाल्न आग्रह गरिएको छ।