गाण्डीवेश्वर स्थानमे सवा करोड़ पार्थिव महादेव पूजाक लेल गामे–गाम हकार

2 घन्टा पहिले प्रकाशित

Smrititimes

जनकपुरधाम
आसिन ८ गते । सिमावर्ती विहार राज्यक मधुबनी जिलाक बेनीपट्टी प्रखंडक शिवनगर स्थित प्रसिद्ध गाण्डीवेश्वर स्थानमे आयोजित होमय बला सवा करोड़ पार्थिव महादेव पूजाक लेल गामे–गाम हकार देल जा रहल अछि।
प्राप्त जानकारीक अनुसार, आयोजन समितिक पदाधिकारीसभक एकटा प्रतिनिधिमण्डल मधुबनी, सीतामढ़ी, दरभंगा, मुजफ्फरपुर सहित पड़ोसी देश नेपालक विभिन्न गाममे पहुँचि स्थानीय लोकसभकेँ पूजा आयोजनमे सहभागी होएबाक लेल आमंत्रित कऽ रहल छथि।
आयोजन समितिक अनुसार, एहि धार्मिक आयोजनमे सहभागी होएबाक लेल एखन धरि मिथिलाक १५१ सँ बेसी गामक लोक अपन सहभागिताक आश्वासन दऽ चुकल छथि। समितिक प्रतिनिधिसभ विभिन्न गाममे सम्पर्क अभियान चलबैत लोकसभकेँ अधिक सँ अधिक संख्यामे आयोजनमे सहभागी होएबाक आह्वान कऽ रहल छथि।
ज्ञात हो जे सवा करोड़ पार्थिव महादेव पूजाक आयोजन एहि वर्ष १८ दिसम्बर केँ शिवनगर स्थित गाण्डीवेश्वर स्थानमे कएल जाएत। आयोजनकेँ सफल बनेबाक लेल आयोजन समिति द्वारा व्यापक स्तरपर तैयारी कएल जा रहल अछि।
पूजाक लेल गामे–गाम चलाओल जा रहल सम्पर्क अभियानक माध्यम सँ श्रद्धालुसभकेँ आयोजनक महत्वक जानकारी देल जा रहल अछि आ अधिक सँ अधिक लोकक सहभागिता सुनिश्चित करबाक प्रयास कएल जा रहल अछि।