बाढी पहिरो प्रभावित १४ जिल्ला सङ्कटग्रस्त क्षेत्र घोषणा

2 वर्ष पहिले प्रकाशित

Smrititimes

काठमाडौँ। सरकारले काठमाडौँ उपत्यकाका तीन जिल्ला सहित १४ जिल्लालाई संकटग्रस्त घोषणा गरेको छ। शुक्रबार सिंहदरबारमा बसेको मन्त्रीपरिषद् बैठकले अविरल वर्षाका कारण बाढी र पहिरोले भएको क्षतिलाई मध्यनजर गर्दै संकटग्रस्त जिल्ला घोषणा गरेको हो।

गृहमन्त्री रमेश लेखकका अनुसार पाँचथर, ओखलढुङ्गा, उदयपुर, सर्लाही, रौतहट, सिन्धुली, मकवानपुर, चितवन, ललितपुर, सिन्धुपाल्चोक, धादिङ, दोलखा, रामेछाप र काभ्रेपलाञ्चोक जिल्ला संकटग्रस्त सूचीमा परेका छन्। प्रधानमन्त्री तथा मन्त्रीपरिषद्को निर्णय अनुसार यी जिल्लामा राहत, उद्धार, पुनर्निर्माण र पुनर्स्थापनाको काम सघन रूपमा अघि बढाइनेछ।

लेखकले भने, “अविरल वर्षाका कारण बाढी र पहिरोले धेरै ठुलो जनधनको क्षति गर्‍यो। अब राहत र उद्धारको कामलाई तीव्र बनाउनका लागि संकटग्रस्त जिल्ला घोषणा गरिएको हो।” गत हप्ता लगातारको वर्षाले देशभरि नै ठूलो क्षति पुर्‍याएको छ।

यसअघि राष्ट्रिय विपत् जोखिम न्यूनीकरण तथा व्यवस्थापन प्राधिकरणले बैठकमा बाढी र पहिरोबाट बढी प्रभावित क्षेत्रका पालिकालाई विपत् संकटग्रस्त घोषणा गर्न सिफारिस गरेको थियो।

सरकारले संकटग्रस्त घोषणा गरेपछि पुनर्निर्माणका लागि आवश्यक बजेट र स्रोत साधनलाई उच्च प्राथमिकतामा राखेर काम अघि बढाइने बताइएको छ।

अविरल वर्षाको असरले गर्दा भौतिक तथा मानवीय क्षति पुगेका विभिन्न जिल्लाहरूमा उद्धार कार्य जारी रहेको छ।