मधेश प्रदेशक मुख्यमन्त्रीक विश्वास मत पुस ४ गते आ सभामुख पदक निर्वाचन पुस ६ गते हएत

9 महीना पहिले प्रकाशित

Smrititimes

जनकपुरधाम
पुस २ गते ।

मधेश प्रदेशक मुख्यमन्त्री कृष्ण प्रसाद यादव पुस ४ गते प्रदेश सभासँ विश्वासक मत लेताह । एहि सम्बन्धमे मुख्यमन्त्री यादव बुधदिन प्रदेशसभा सचिवालयमे पत्र पठौने छथि । नेपालक संविधानक धारा १६८ क उपधारा ४ अनुसार विश्वासक मत लेबाक प्रावधान रहल अछि, ओही अनुसार पुस ४ गते साँझ ४ बजे विश्वासक मत लेबाक व्यवस्था मिलाबय लेल प्रदेशसभा सचिवसँ आग्रह कएल गेल अछि । एहिसँ पहिने सात दलक बैसार पुस ४ गते विश्वासक मत लेबाक मिति तय भऽ चुकल छल ।

मधेश प्रदेश सभामे रहल सात दलक समर्थन सँ गत अगहन १९ गते नेपाली काँग्रेसक संसदीय दलक नेता कृष्ण प्रसाद यादव केँ प्रदेश प्रमुख डा. सुरेन्द्रलाभ कर्ण मधेश प्रदेशक छठम मुख्यमन्त्रीक रूपमे नियुक्त कएने छलाह । ओहि कारणे आब मुख्यमन्त्री यादव विश्वासक मत लेबय जा रहल छथि ।मधेश प्रदेश सरकारमे नेपाली काँग्रेसक संग–संग जनता समाजवादी पार्टी नेपाल, जनमत पार्टी, नेकपा माओवादी केन्द्र, लोकतान्त्रिक समाजवादी पार्टी नेपाल, नेकपा एकीकृत समाजवादी आ नागरिक उन्मुक्ति पार्टीक समर्थन रहल अछि ।

इम्हर, मधेश प्रदेश सभाक सभामुख पद लेल पुस ६ गते निर्वाचन होएत । बुधबार बैसल प्रदेश सभा बैसारमे उपसभामुख बबिता राउत ईशर पुस ६ गते सभामुख निर्वाचन होएत अछि, से बातक जानकारी प्रदेश सभामे देने छलथिन । सभामुख पद रिक्त रहल कारणे प्रदेशसभा कार्य सञ्चालन नियमावली २०७५ क नियम ७ अनुसार सभामुख निर्वाचन कराएल जाएत, से उपसभामुख जानकारी देने छलथिन । निर्वाचनक प्रक्रिया लेल उपसभामुख बबिता राउत ईशर प्रदेशसभा सचिव वासुप्रसाद कोइराला केँ पुस ५ गते सभामुख निर्वाचन सम्बन्धी सूचना प्रकाशित करबाक निर्देशन देने छलखिन । बुधदिनक बैसारमे उपसभामुख राष्ट्रपति कार्यालय, प्रदेश प्रमुखक कार्यालय आ सर्वोच्च अदालत सँ आएल विभिन्न पत्र सभामे पढिक सुनौने छलखिन ।
बुधदिनक बैसारमे सभामुख सँ अनुमति लए जनता समाजवादी पार्टी नेपालक प्रदेशसभा सदस्य ललिता विद्रोही सवारी दुर्घटनाक नाम पर हत्या करबाक प्रयास भेल आरोप लगौने छलखिन आ ओहि घटनाक निष्पक्ष छानबिन करबाक मांग कएने छलथि ।