फुटपाथ अतिक्रमण विरुद्ध ३१५ हस्ताक्षर नगरप्रमुख केँ बुझाओल गेल

5 महीना पहिले प्रकाशित

Smrititimes

जनकपुरधाम, २५ माघ ।
जनकपुरधामक मुख्य सड़क आ बाजार क्षेत्रमे बढ़ैत फुटपाथ अतिक्रमण विरुद्ध पत्रकार ध्रुव झाक संयोजनमे चलाओल गेल हस्ताक्षर अभियान अंतर्गत ३१५ नागरिकक हस्ताक्षर रबिदिन नगरप्रमुख मनोजकुमार साह केँ सौंपल गेल ।

जनकपुरधाम उपमहानगरपालिका कार्यालयमे आयोजित कार्यक्रममे हस्ताक्षर बुझाओल गेल । अभियानक उद्देश्य अव्यवस्थित व्यापार आ फुटपाथ अतिक्रमण हटाबय लेल स्थानीय सरकार पर दबाब बनाबय रहल ।

हस्ताक्षर ग्रहण करैत नगरप्रमुख साह जनकपुरधाम केँ व्यवस्थित, साफ–सुथरा आ नागरिक–मैत्री शहर बनेबाक प्रतिबद्धता दोहरौलनि । ओ कहलनि जे फुटपाथ आ सड़क आम नागरिकक साझा संपत्ति छी आ अतिक्रमण विरुद्ध उपमहानगरपालिका निरंतर कड़ाईसँ कारबाही करैत आबि रहल अछि ।

ओ जानकारी देलनि जे एखन धरि करीब एक हजार सँ बेसी अतिक्रमणकारी पर कारबाही भ’ चुकल अछि आ आगाँ भी गैरकानूनी संरचना आ अव्यवस्थित व्यापार प्रति कोनो सहनशीलता नहि देखाओल जेतय ।

अभियान संयोजक पत्रकार ध्रुव झाले कहलनि जे विगत डेढ़ वर्ष सँ फुटपाथ अतिक्रमण विरुद्ध आवाज उठाओल जा रहल अछि आ नागरिक दबाबेक कारणेँ स्थानीय सरकार एखन बेसी सक्रिय भेल अछि । ओ कहलनि जे पैदल यात्रीक सुरक्षित आवागमन नागरिकक अधिकार छी आ ई अभियान अधिकार संरक्षण लेल चलाओल जा रहल अछि ।

आगामी दिनमे अनुगमन, जनचेतना आ दबाबमूलक कार्यक्रम निरंतर चलाओल जाएत, अभियान पक्ष सँ जनाओल गेल ।