महोत्तरीमे निर्वाचन सुरक्षा सम्बन्धी नीति–निर्देशन कार्यक्रम सम्पन्न

2 महीना पहिले प्रकाशित

Smrititimes

जलेश्वर, माघ २५ गते ।
आगामी प्रतिनिधि सभा सदस्य निर्वाचन–२०८२ के लक्ष्य कऽ जिल्ला महोत्तरीमे सुरक्षा परिचालन सम्बन्धी नीति–निर्देशन कार्यक्रम सम्पन्न भेल अछि।
जलेश्वर नगरपालिका–७ स्थित मनिपाल ग्राउन्डमे आयोजित कार्यक्रममे मधेश प्रदेश प्रहरी कार्यालय जनकपुरधामक प्रमुख प्रहरी नायव महानिरीक्षक (डीआईजी) गोविन्द थपलिया प्रशिक्षणके क्रममे निर्वाचन प्रहरी सभके विस्तृत निर्देशन देने छथि। कार्यक्रमक क्रममे डीआईजी थपलिया निर्वाचन आचारसंहिता पालनक महत्वपूर्ण बुँदा सभ, मतदान स्थल आ मतदान केन्द्रमे खटाएल प्रहरी सभक भूमिका, दायित्व आ आचरणक विषयमे स्पष्ट जानकारी दैत शान्तिपूर्ण, स्वच्छ आ निष्पक्ष निर्वाचन सुनिश्चित करबाक लेल सम्पूर्ण सुरक्षाकर्मी सभके उच्च सतर्कता सँ अपन जिम्मेवारी निभाबयके निर्देश देलनि।
ओ मतगणना स्थलमे सुरक्षाक संवेदनशीलता, भीड व्यवस्थापन, मतदाता सहयोग, आपत्कालीन अवस्थामे अपनाबयके विधि तथा निर्वाचन प्रक्रियामे सुरक्षा चुनौती सभक पहिचान आ समाधान सम्बन्धी व्यावहारिक प्रशिक्षण जरूरी रहल बात सेहो उल्लेख केलनि।
कार्यक्रममे निर्वाचन सुरक्षा तैयारीमे खटाएल विभिन्न तह–तप्काक प्रहरी अधिकृत आ जवान सभक सहभागिता रहल जानकारी जिल्ला प्रहरी कार्यालय देने अछि।