नेपाली कांग्रेसक प्रतिज्ञा सभा जनकपुरधाममे सम्पन्न सभापति गगन थापा कहलनि— कांग्रेस देशक नेतृत्व ल’ क’ कुशासन हटाएत

2 घन्टा पहिले प्रकाशित

Smrititimes

बटुकनाथ झा
फागुन ६ गते जनकपुरधाम । नेपाली कांग्रेस बुधदिन जनकपुरधाममे प्रतिज्ञा सभा क’ चुनावी घोषणा पत्र सार्वजनिक कएलक। तिरहुतिया गाछीमे आयोजित एक समारोहमे ‘प्रतिज्ञा पत्र’ सार्वजनिक करैत सभापति गगन थापा कहलनि जे नेपाली कांग्रेस देशक नेतृत्व संभालि क’ कुशासन हटाएत । ओ कहलनि, “मधेस सँ कांग्रेस देश बदलबाक साहस लेने अछि, आँट लेने अछि। आब मधेसक जिम्मेदारी अछि जे देशक संघीयताकेँ लागू कराबए।” हुनकर कहब छल जे शिक्षा, स्वास्थ्य, विज्ञान आ सूचना प्रविधिक क्षेत्रमे मधेस देशकेँ नेतृत्व दे सकैत अछि, एहनमे आब परिवर्तनक अगुवाई मधेसकेँ करए पड़त। कांग्रेस मधेसकेँ ज्ञानक केन्द्र बनाबए लेल मधेस आयल ओ बतौलनि । ओ कहलनि जे हाल मधेस शिक्षाक क्षेत्रमे कमजोर देखाइत अछि, एहनमे मधेसकेँ ज्ञानक केन्द्र बनाबए जरूरी अछि। “हम मधेसकेँ ज्ञानक केन्द्र बनाबए आयल छी,” थापाक कहब छल।
संघीयताकेँ मजबूत बनाबए पर जोर दैत ओ कहलनि जे योजना आ संकल्पक संग मधेस आयल छी। “संघीयताकेँ बचाबए पड़त, कामकाजी बनाबए पड़त,” थापा कहलनि, “मधेस प्रदेशकेँ केन्द्रमे राखि नेपालक संघीयतामे देखाइत समस्या सभक समाधान क’ हम प्रमाणित करब जे नेपालकेँ संघीयता कियैक जरूरी अछि।”
समारोहमे कांग्रेसक उपसभापति विश्वप्रकाश शर्माक कहलनि जे पुरान ढंग सँ चलि क’ नव देश नहि बन सकैत। ओ दाबी कएलनि जे कांग्रेस बदलल संदेश देबए मधेस आयल अछि। फागुन २१ क’ चुनाव मात्र सोचि क’ नहि चलत। “हम आइ लेल मात्र नहि, २०८२ साल लेल मात्र नहि, बल्कि २०९२ साल धरि सोचि रहल छी,” हुनकर कहब छल ।
ओ कहलनि जे देश सम्हारए लेल कांग्रेस बदलि क’ आयल अछि। “पुरान ढंग सँ चलि क’ नव परिणाम नहि दे सकैत छी। नव संसद, नव सरकार बनाबए मात्र नहि, हम सभकेँ अपन ढंग सेहो बदलए पड़त। नव सोच आ नव तरिका सँ आगाँ बढ़ए लेल हम मधेस आयल छी। हम नव रूपमे आयल छी,” शर्मा कहलनि। कांग्रेस नेता विमलेन्द्र निधि मधेसक जनता सँ संघीयता बचाबए लेल कांग्रेसकेँ मतदान करबाक आग्रह कएलनि। सभा मे कांग्रेसक केन्द्र, प्रदेश आ स्थानीय तहक नेता, पार्टी पदाधिकारी आ हजारौं कार्यकर्ता उपस्थित छलाह।

निधिक कहब छल जे संघीयता खतरा मे अछि। “ई सामान्य चुनाव नहि अछि। संविधान खतरा मे अछि, लोकतंत्र खतरा मे अछि, संघीयता खतरा मे अछि। एकरा बचाबए लेल कांग्रेसकेँ जिताबए जरूरी अछि,” ओ कहलनि। ओ आगाँ कहलनि जे आगामी निर्वाचन सँ गगन थापक नेतृत्वमे सरकार बनए जरूरी अछि, आ एकर लेल गाछी छापमे मतदान करबाक आग्रह कएलनि।